Жыхары Гародні і Навагрудка заставаліся без святла
- 7.02.2017, 10:12
- 23,594
Электрычнасць двойчы прападала ў жылых дамах, кінатэатрах і бальніцы хуткай дапамогі.
У Горадні 6 лютага двойчы за дзень адбываліся адключэнні электрычнасці, паведамляе прэс-служба Гарадзенскага абласнога ўпраўлення МНС.
Першае здарэнне адбылося а 8.42 раніцы. Без электрычнасці аказалася чатыры шматкватэрныя жылыя дамы на вул. Паповіча, кінатэатр «Кастрычнік», ААТ «Белаграпрамбанк», гарадская клініка хуткай медыцынскай дапамогі (там запусцілі дызель-генератар). Прычынай аварыі стала пашкоджанне кабельнай лініі 10 кВ. Электразабеспячэнне спажыўцоў было адноўлена а 9.20.
Вечарам, а 21.05, у абласным цэнтры зноў адбылася аварыя з электрычнасцю і з той жа прычыны. На гэты раз без святла засталіся 38 шматкватэрных жылых дамоў на вуліцах Брыкеля, Таўлая, Ліможа. Аднавіць падачу электрычнасці спецыялісты здолелі а 21.30.
Таксама ўвечары праблемы з электразабеспячэннем паўсталі ў жыхароў Навагрудка. А 20.15 без святла аказалася 48 прыватных жылых дамоў. Аднавіць ім падачу электрычнасці ўдалося толькі праз дзве гадзіны. Прычынай здарэння стаў выхад з ладу трансфарматара ТМГ-160.