У Пецярбургу тысячы людзей выйшлі на мітынг у абарону горада

Агульнагарадская акцыя «Марш у абарону Пецярбурга» сабрала на Марсавым поле паводле розных ацэнак ад 6 да 10 тысяч чалавек.

Нават праз гадзіну пасля яе пачатку туды ўсё яшчэ ішлі людзі. Акцыю меркавалася патроіць 19 сакавіка, але гарадскія ўлады не ўзгаднілі яе, патлумачыўшы гэта тым, што ў нядзелю на Марсавым поле на цэлы дзень запланаваная масавая акцыя «Мора хвалюецца». Магчыма, толькі дзякуючы шматлікім адкрытым зваротам простых і вядомых гараджан да Смольнага акцыю ўсё ж узгаднілі, змяніўшы дату, паведамляе «Радыё Свабода».

Арганізатары падкрэсліваюць, што галоўная мэта мітынгу - абараніць ад спусташэння многія значныя для горада аб'екты: Пулкаўскую абсерваторыю, Расейскую нацыянальную бібліятэку (так званую «публічку»), Еўрапейскі ўніверсітэт, гістарычную забудову, якая знішчаецца пры поўным раўнадушшы чыноўнікаў. Але на мітынгу больш за ўсё казалі пра Ісаакіеўскі сабор.

Сярод выступоўцаў быў гісторык Леў Лур’е, які нагадаў гараджанам аб іх мінулых перамогах - пра тое, што яны не далі пабудаваць у цэнтры вежу «Газпрома», не аддалі суддзям Канстытуцыйнага суда 31-ю лякарню, не дазволілі зладзіць у будынку Канюшневага ведамства 5-зоркавы гатэль. Гісторык заклікаў не здавацца - не аддаваць Ісаакіеўскі сабор, «Публічку», Пулкаўскую абсерваторыю. На ягоную думку, у горадзе бяздарнае кіраўніцтва, якое стварае вакол сябе шэрую правінцыйную атмасферу. З лозунгам адстаўкі губернатара Палтаўчанкі выступіў каардынатар «Адкрытай Расеі» ў Пецярбургу Андрэй Півавараў і іншыя выступоўцы.

Вядомы рэжысёр Юрый Мамчын, які прыйшоў на мітынг, заявіў, што чыноўнікі не клапоцяцца пра горад, што яны зрабілі яго рэзідэнцыяй на адкрытым паветры для прыёму замежных гасцей. На думку Мамчына, Пецярбург для большасці чыноўнікаў - проста трамплін, каб сысці ў Маскву. На ініцыятыву рэжысёра мітынгоўцы пракрычалі «Ганьба» рэктарам універсітэтаў, якія падпісалі ліст з просьбай перадаць Ісаакіеўскі сабор Царкве ўжо да Вялікадня. На мітынгу была выкананая новая песня Аляксандра Гарадніцкага, які паклікаў «наш вялікі горад не даць раскрасці».

На акцыі выступілі таксама дэпутаты Заканадаўчага сходу Пецярбурга Барыс Вішнеўскі, Аксана Дзмітрыева, Аляксей Кавалёў, Міхаіл Амосаў, артыст Іван Краско, якія заклікалі гараджан супрацьстаяць спробам разбурэння навуковага і культурнага патэнцыялу Пецярбурга.