Міністэрства аховы здароўя мае намер забараніць рэкламу лекаў у Беларусі

Пры гэтым прадстаўніца Міністэрства аховы здароўя прызнала, што аб новых айчынных леках часам не ведаюць не толькі людзі, але нават лекары.

Міністэрства аховы здароўя Беларусі мае намер дамагчыся ў будучыні поўнай забароны на рэкламу лекаў у краіне, як гэта зроблена ў Вялікай Брытаніі. Канкрэтныя тэрміны не называюцца, але кірунак дзеянняў пазначаны выразна.

Са слоў загадчыцы Рэспубліканскай клініка-фармакалагічнай лабараторыі УП «Цэнтр экспэртыз і выпрабаванняў у ахове здароўя» Ірыны Яфрэмавай, сёння ў Беларусі рэцэптурныя лекавыя сродкі рэкламуюцца толькі ў спецыяльных часопісах, спіс якіх зацвярджаецца Міністэрствам аховы здароўя, піша ej.by.

Безрэцэптурныя лекавыя сродкі могуць рэкламавацца ва ўсякіх выданнях, чым часта злоўжываюць рэкламадаўцы. Менавіта таму жорсткі падыход Міністэрства аховы здароўя да рэкламы лекаў цалкам апраўданы.

«Мы сапраўды бачым факты, калі вытворцы рэкламы і рэкламныя агенцтвы, не ведаючы тэмы, спрабуюць палепшыць уласцівасці асобнага прэпарата. Таму, на наш погляд, тое, што мы бачым у рэкламных матэрыялах, не павінна трапляць на рынак рэкламнай прадукцыі, бо там ідуць суцэльныя перабольшанні: адзін выхваляецца перад іншым, ідзе гарантыя эфекту, гарантыя адсутнасці непажаданых рэакцый. Фактычна распаўсюджваецца інфармацыя, якая не адпавядае рэчаіснасці. Таму мы мяркуем, што цяпер у Беларусі дзейнічае рацыянальны падыход да рэкламы лекавых сродкаў», – заявіла Ірына Яфрэмава.

Гэты рацыянальны падыход будзе станавіцца яшчэ больш рацыянальным.

Як заявіла начальніца ўправы арганізацыі вытворчасці і перспектыўнага развіцця Дэпартамента фармацэўтычнай прамысловасці Міністэрства аховы здароўя Таццяна Тумеля, нягледзячы на скаргі асобных вытворцаў і пастаўшчыкоў лекавых сродкаў лібералізацыі правілаў рэкламы лекаў у краіне не плануецца, бо ў гэтым няма неабходнасці.

Наадварот, Міністэрства аховы здароўя мяркуе, што рэклама ўсіх без выключэння лекавых прэпаратаў у Беларусі павінна быць цалкам забароненая, як гэта зроблена, напрыклад, у Вялікай Брытаніі.

«Нягледзячы на тое, што мы падтрымліваем нашых вытворцаў лекавых сродкаў, рэкламаваць трэба здаровы лад жыцця, а не таблеткі», – патлумачыла пазіцыю Міністэрства аховы здароўя Таццяна Тумеля.

Так, згодна з навуковым даследаваннем, на 50% здароўе чалавека залежыць ад ладу жыцця, 15-20% прыпадае на спадчыннасць, на 20-25% на чалавека ўплывае навакольнае асяроддзе і толькі 10-15% прыпадае на медыцынскае забеспячэнне, сярод якога медыкаментознае лячэнне займае пэўную невялікую долю.

«Вядома, вытворцы зацікаўленыя ў рэкламе, бо маркетынг ніхто не касаваў. Але нічога ў заканадаўстве пакуль мяняцца не будзе. Павінна заўважыць, што ў такіх краінах, як, напрыклад, Англія, рэклама лекаў забароненая ўвогуле. Гэта нармальна і калі-небудзь мы да гэтага таксама прыйдзем. Лекавыя сродкі – гэта не тавар, які рэкламавацца ў прынцыпе не павінен. Проста на гэтым этапе развіцця нашай фармацыі ў нас часткова рэклама лекавых сродкаў дазволеная і пакуль гэта будзе так, але не больш за тое», – заявіла Таццяна Тумеля.

Пры гэтым прадстаўніца Міністэрства аховы здароўя прызнала, што ў Беларусі аб новых айчынных леках часам не ведаюць не толькі простыя людзі, якія прыходзяць у аптэкі, але нават лекары.