Беларускія пяціборцы перамаглі ў змешанай эстафеце на этапе Кубка Свету ў Каіры

Ужо паводле вынікаў першага віду праграмы - фехтавання - беларусы ўпэўнена займалі першае месца.

Беларускія прадстаўнікі сучаснага пяцібор'я Ірына Прасенцова і Кірыл Касьянік перамаглі ў змешанай эстафеце на другім этапе Кубка свету ў Каіры, паведамляе БелТА.

Паводле вынікаў першага віду праграмы - фехтавання - Ірына Прасенцова і Кірыл Касьянік набралі 247 балаў і ўпэўнена займалі першае месца.

Паспяхова склалася для беларусаў плаванне і канкур, што дазволіла ім выйсці першымі на старт у камбінаваным відзе (стральба і крос). У выніку свайго лідарства яны не ўпусцілі, набраўшы 1431 бал.

Другое месца занялі брытанцы Майлз Пілэйдж і Джаана Мюір - 1403 балы, трэцімі сталі вугорскія пяціборцы Тамаш Бенцэ Фроліх і Тамара Алексежаў - 1389 балаў. Узнагароджанне пераможцаў праводзіў кіраўнік Міжнароднага саюза сучаснага пяцібор'я Клаус Шорман.

Ён адзначыў моцную школу гэтага віду спорту ў Беларусі, якая ўваходзіць у лік найлепшых у свеце. «Выступленне ў эстафеце з самага пачатку атрымалася ўдалым. Разам з Кірылам былі сур'ёзна настроены, і галоўнае было адпрацаваць усё да канца», - распавяла пасля ўзнагароджання Ірына Прасенцова.