Naviband збіраецца «ўзляцець» на выступленні на «Еўравізіі»

Пастаноўкай нумара музыкаў займаецца ўкраінская каманда, якая працавала з Джамалой.

Гурт NAVIBAND, прадстаўнік Беларусі на міжнародным конкурсе песні «Еўравізіі-2017», у «Дзённіках «Еўравізіі» інтрыгуе паведамленнем пра палёт падчас выступу на сцэне ў Кіеве, паведамляе БелТА.

Музыкі гурту Арцём Лук'яненка і Ксенія Жук намякаюць, што будуць «лётаць» на сцэне конкурсу-2017, аднак дэталі не раскрываюць, больш таго, дзеляцца страхам вышыні.

Пастаноўкай нумара NAVIBAND займаецца ўкраінская каманда, якая працавала з прадстаўнікамі Украіны на «Еўравізіі», Златай Агневіч і Джамалой. Харэограф Таццяна Астраверх, якая ставіла нумар для ўкраінскай удзельніцы «Еўравізіі-2013» Злата Агневіч, бачыць на сцэне дуэт, але не сяброў, а закаханых.

Гісторыя кахання, расказаная праз погляды, далікатныя дотыкі, і фінальны акорд, калі Ксенія кладзе галаву на плячо Арцёму - на сцэне будзе рамантычная пастаноўка. Плюс фірмовы танец рукамі пад умоўнай назвай «хей, хей, хей-е-е-е-о!». Дарэчы, танец рукамі Златы Агневіч запомніўся гледачам «Еўравізіі-2013», на якім спявачка заняла трэцяе месца.

Стыліст Дзмітрый Курата таксама супрацоўнічаў са Златай і Джамалой. Убранне ад Дзмітрыя адзяваў волат, які выносіў далікатную Злату на сцэну, а трыумфатарка «Еўравізіі-2016» абрала для выступлення касцюм іншага аўтара. Стыліст прапанаваў беларускім артыстам тры варыянты ўбрання на выбар, кожны з якіх павінен падкрэсліць іх маладосць і запал, светлую гісторыю, якую яны хочуць данесці гледачам. На думку музыкаў, у касцюмах павінны прысутнічаць элементы, якія падлятаюць, а вобразы быць лёгкімі.

Міжнародны конкурс песні «Еўравізіі-2017» пройдзе ў Кіеве з 9 да 13 траўня. Першы паўфінал адбудзецца 9 траўня, другі - 11-га, фінал - 13 траўня. Гурт NAVIBAND выступіць у другім паўфінале «Еўравізіі-2017» у другой ягонай частцы.