Пачалося прымусовае высяленне мянчанкі, якая пратэставала на кране

Сёння сям'ю Ігнатовічаў расселяць у тры двухпакаёвыя кватэры.

Выселіць сям'ю Ігнатовічаў з іх дома маглі яшчэ 1 лютага, аднак у прызначаны дзень Галіна Канстанцінаўна наважылася на адчайны крок. У знак пратэсту супраць несправядлівай кампенсацыі за зруйнаванне дома яна забралася на вежавы кран і пагражала з яго скінуцца. Тады ўлады горада і гарадская пракуратура паабяцалі разабрацца ў гэтай справе. Але разбіранне ні да чаго не прывяло.

Сёння сям'ю Ігнатовічаў расселяць у тры двухпакаёвыя кватэры ў дамах на вул. Выгоцкага, 133, вул. Русіянава, 46, пр. Газета «Звязда», 69, паведамляе tut.by.

10 з 11 чалавек, якія пражываюць у доме, ужо знятыя з рэгістрацыйнага ўліку ў доме на вуліцы Ржавецкай.

— Учора ўвечары зноў прынеслі апавяшчэнне ад аддзела прымусовага выканання, аб тым што сёння прыйдуць высяляць, — расказвае Галіна Канстанцінаўна.

У паведамленні пералічаныя тыя сябры сям'і, якіх яно тычыцца: 10 чалавек. Новая жонка Івана Ігнатовіча, Таццяна Марынчык, не згаданая. Яе суд першай інстанцыі пастанавіў выселіць у «двушку» да мужа і яго былой жонкі, Галіны Ігнатовіч, але гэта пастанова яшчэ абскарджваецца.

Галіна Ігнатовіч хоча, каб долю сем'яў яе сыноў аддалі кватэрамі, а ёй з мужам выплацілі грашовую кампенсацыю, каб яны маглі, нарэшце, раз'ехацца, купіўшы асобнае жыллё, хай і не ў Менску. Забудоўшчык, група кампаній «ТАПАС», упэўнены: законнасць была выкананая ў поўным аб'ёме. А Ігнатовічы «хочуць узбагаціцца».

Пастанова суда аб высяленні была прыпыненая да заканчэння пракурорскай праверкі.