Рассельгаснагляд чарговым разам забракаваў мяса з Беларусі
4- 28.03.2017, 14:59
- 16,722
Установа не пусціла ў РФ 20 тон беларускай ялавічыны.
Супрацоўнікі ўправы Рассельгаснагляду Бранскай і Смаленскай абласцей забаранілі ўвоз у Расею 20 тон замарожанай ялавічыны ў паўтушы вытворчасці «Столінзагатпрамторг» (філіял Столінскага райпо, Беларусь), паведамляе прэс-служба структуры.
Груз, затрыманы 26 сакавіка ў бранскім пункце прыняцця паведамленняў «Чырвоны Камень» на аўтадарозе М-13 «Бранск-Гомель», суправаджаўся сертыфікатам ветэрынарнай службы Беларусі. Аднак падчас надгляду былі выяўленыя сляды зачысткі ветэрынарных клеймаў. Акрамя таго, інспектары адзначылі, што санітарны стан мяса быў нездавальняючым, і яно перавозілася з парушэннем тэмпературнага рэжыму. Груз вернуты адпраўніку.
Гэта не першы ў гэтым месяцы выпадак вяртання ялавічыны філіялу «Столінзагатпрамторгу». Так, 8 сакавіка таксама ў ППУ «Чырвоная Горка» быў забаронены ўвоз у Расею 5 тон замарожаных блокаў з мяса ялавічыны гэтай кампаніі. Тады супрацоўнікаў управы Рассельгаснагляду Бранскай і Смаленскай абласцях насцярожыла тое, што пакаванні з прадукцыяй можна было раскрыць, не парушаючы цэласнасці маркіровачных этыкетак.