МЗС Украіны накіраваў Беларусі ноту аб затрыманні ўкраінцаў на Дзень Волі
5- 28.03.2017, 18:56
- 31,637
У Беларусі затрыманыя двое грамадзян Украіны падчас акцый, якія прайшлі ў Менску ў мінулыя выходныя.
МЗС Украіны накіраваў ноту Беларусі для атрымання інфармацыі аб прычынах і абставінах затрымання.
Пра гэта ў эфіры «Громадське ТВ» заявіў начальнік консульскай управы забеспячэння Міністэрства замежных спраў Украіны Васіль Кірыліч.
«Паводле папярэдняй інфармацыі, затрыманы яшчэ адзін грамадзянін Украіны, які ўтрымліваецца ў цэнтры ізаляцыі правапарушальнікаў у Менску», — сказаў Кірыліч.
Напярэдадні вечарам у МЗС Украіны не ведалі, якое пакаранне вынеслі затрыманаму, прозвішча яго ў эфіры прадстаўнік установы не назваў.
Кірыліч заявіў, што Украіна накіравала ў МЗС Беларусі ноту з мэтай атрымання поўнай і аб'ектыўнай інфармацыі аб прычынах і абставінах затрымання ўкраінскіх грамадзян.
Імя першага затрыманага 25 сакавіка ўкраінца вядома — Руслан Цярэшчанка. Яму далі 15 дзён арышту, абвінаваціўшы ў дробным хуліганстве і непадпарадкаванні законнаму патрабаванню службовай асобы.
Са слоў Кірыліча, найбліжэйшым часам затрыманага наведае консул, каб вызначыць варункі ягонага ўтрымання.
27 сакавіка ў Менску прайшлі масавыя суды над затрыманымі на не дазволеных уладамі акцыях з нагоды Дня Волі 25 і 26 сакавіка.