Левая рука не ведае, што робіць правая

У Крычаўскім раёне, які з'яўляецца лідарам паводле ўзроўню беспрацоўя, чыноўнікі і дзяржаўныя СМІ займаюцца прымітыўнай фальсіфікацыяй лічбаў і фактаў.

Калі не вельмі дасведчаны ў эканоміцы чытач прачытае у Крычаўскай раённай газеце «Крычаўскае жыццё» за 1 сакавіка гэтага года «Справаздачу аб рабоце раённага выканаўчага камітэта у сацыяльна-эканамічным развіцці раёна ў 2016 годзе («Справаздача»), то яму можа здацца, што дзякуючы самаадданай працы чыноўнікаў тут хутка будзе на практыцы пабудаваны камунізм, піша «Магілёўскі рэгіён».

Але, на жаль, – гэта проста ілюзія. І дасягаецца яна прымітыўнай гульнёй патрэбных лічбаў і фактаў на паперы. Пры гэтым, як кажуць у народзе, – «Левая рука не ведае, што робіць правая». Мяркуеце самі.

«Важным кірункам дзейнасці райвыканкама з'яўляецца забеспячэнне развіцця прадпрымальніцкага сектара. Цягам 2016 года ў горадзе было створана 8 камерцыйных арганізацый, у сферы прадпрымальніцтва арганізавана 335 рабочых месцаў, або 88% ад усіх створаных працоўных месцаў у раёне», — напісана ў раздзеле справаздачы, што тычыцца працы з прадпрымальнікамі.

У гэтым жа справаздачы, дзе гаворка ідзе аб сітуацыі на рынку працы, фігуруюць зусім іншыя лічбы. «Агулам сітуацыя на рынку працы раёна цягам года заставалася стабільнай і кантраляванай, узровень беспрацоўя на 1 студзеня 2017 года склаў 1,2% да колькасці эканамічна актыўнага насельніцтва. Усімі суб'ектамі гаспадарання на створаныя працоўныя месцы ў справаздачным перыядзе працаўладкавана 53 чалавекі», — чытаем у газеце «Крычаўскае жыццё». Выходзіць, стварылі 335 рабочых месцаў, а ўладкавалі на іх 53 чалавекі?!

Яшчэ больш падазрона выглядаюць вышэй названыя лічбы на фоне інфармацыі статыстычнага аддзела Магілёўскай вобласці, паводле якога ў Крычаўскім раёне па выніках работы за 11 месяцаў 2016 года колькасць занятых у эканоміцы раёна зменшылася на 700 чалавек (з 13,0 тысяч да 12,3 тысяч чалавек). Мала таго, паводле інфармацыі сайта tut.by ад 03.03.2017 года, Крычаўскі раён па выніках работы за студзень 2017 года стаў лідарам сярод раёнаў Беларусі паводле ўзроўню беспрацоўя -1,6% (202 чалавекі) да эканамічна актыўнага насельніцтва.

Нагадаем нашым чытачам яшчэ пару цікавых лічбаў, якія мы падавалі раней пра гэты рэгіён. Падатковая інспекцыя Крычаўскага раёну накіравала мясцовым «дармаедам» больш за 4 000 тысячы «лістоў шчасця». На 1 сакавіка гэтага года, за скасаванне Дэкрэта №3 у Крычаўскім раёне падпісалася больш за 1 000 чалавек. І падпіска актыўна трывае.