Як дыктатар падставіў сябе заявай пра Аршанскі раён
43- 25.04.2017, 9:59
- 19,418
Лукашэнка так дагэтуль і не зразумеў, што яму лепш маўчаць, чым гаварыць.
«Населеныя пункты Барань, Балбасава, Ворша павінны быць паднятыя з руін і попелу», – заклікаў Аляксандр Лукашэнка ў «пасланні народу і парламенту». Што ж там не так? – разбіраецца «Салідарнасць».
Усе тры населеныя пункты ўтвараюць Аршанскі раён. Увага да яго з боку кіраўніка цалкам вытлумачальная – бо ён там нарадзіўся. Згодна з афіцыйнай біяграфіі – у гарадскім пасёлку Копысь.
Але што не цалкам вытлумачальнае, так гэта тое, чаму раёну была выдадзеная характарыстыка «ляжыць у руінах».
Незадоўга да штогадовага паслання, на Вялікдзень, Лукашэнка пабываў у Барані, дзе заявіў, што Аршанскі раён – «адзін з самых складаных рэгіёнаў у Беларусі па працаўладкаванні, занятасці насельніцтва».
Што ж гавораць лічбы? На пачатак сакавіка ўзровень зарэгістраванага беспрацоўя ў Аршанскім раёне складаў 1,4%. Гэта сапраўды даволі высокі паказчык. Але праўда ў тым, што ёсць рэгіёны, дзе сітуацыя прыкметна горшая.
У Лідскім і Маладзечанскім раёнах узровень беспрацоўя — 1,7% , у Шчучынскім, Капыльскім і Крычаўскім – 1,6%, у Бярозаўскім, Мастоўскім, Шаркаўшчынскім, Кармянскім і Хойніцкім раёнах – 1,5%, паведамляў finance.tut.by.
А калі ўзяць самы папулярны эканамічны паказчык – па сярэдняму заробку – то акажацца, што Аршанскі раён знаходзіцца прыкладна ў сярэдзіне спісу беларускіх рэгіёнаў.
Вось і атрымліваецца, што сваёй заявай падчас паслання дыктатар сур'ёзна падставіўся.
Ён не толькі ўскосна прызнаў, што за два дзесяцігоддзі яго праўлення Аршаншчына апынулася ў «руінах і ў попеле». Дарэчы, вось свежая заява кіраўніка Віцебскага аблвыканкама Мікалая Шарстнёва аб раёне: «Мы страцілі нават тыя вынікі, якія мелі ў савецкія гады, абрынуліся ўніз, асобныя паказчыкі зменшыліся ўдвая і больш».
Аляксандр Лукашэнка таксама пагадзіўся (хай і неўсвядомлена), што ў многіх беларускіх рэгіёнах сітуацыя наогул горш няма куды – бо нават Аршанскі раён прымудраецца апярэджваць іх па эканамічных паказчыках.