Штаб Макрона сарваў кібератакі расейскіх хакераў

Спецслужбы РФ не змаглі паўплываць на ход першага тура прэзідэнцкіх выбараў у Францыі.

«Хакеры з характэрнымі адметнымі прыкметамі пракрамлёўскай групоўкі ў апошнія тыдні спрабавалі атрымаць доступ да ўліковых запісаў электроннай пошты перадвыбарчага штаба кандыдата ў прэзідэнты Францыі Эмануэля Макрона, заявіла ў панядзелак кампанія па кібербяспецы, што выклікала асцярогі ўмяшання ў выбары ў апошнія два тыдні французскай прэзідэнцкай кампаніі», - паведамляе The Wall Street Journal (пераклад – inopressa.ru).

«У дакладзе, які павінен быць апублікаваны ў аўторак, даследчая кампанія ў сферы бяспекі кампаніі Trend Micro ідэнтыфікавала пракрамлёўскую хакерскую групоўку, якую яна называе Pawn Storm, як магчымую крыніцу комплекснай фішынгавай атакі на перадвыбарчы штаб Макрона, што пачалася ў сярэдзіне сакавіка», - удакладняе аўтар артыкула Сэм Шэхнер.

Падчас атакі хакеры стварылі шматлікія інтэрнэт-адрасы, што імітавалі адрасы сервераў перадвыбарчага штаба, у спробе падманам прымусіць супрацоўнікаў Макрона выдаць свае сеткавыя паролі, заявіў Фэйке Акебор, вядучы даследчык Trend Micro (Токіа) і аўтар дакладу, з копіяй якога азнаёмілася WSJ.

Фішынгавыя электронныя лісты былі хутка выяўлены і заблакаваныя, і малаверагодна, што іншыя прайшлі незаўважанымі, сказаў Мунір Маджубі, кіраўнік аддзела кампутарнай бяспекі перадвыбарчага штаба Макрона.

«Хакерская групоўка Pawn Storm, вядомая іншым кампаніям у сферы кібербяспекі пад імёнамі Fancy Bear або APT28, была ідэнтыфікаваная амерыканскімі афіцыйнымі асобамі і экспэртамі па кібербяспекі летась як расейская арганізацыя, якая карыстаецца дзяржаўнай падтрымкай», - піша выданне, нагадваючы аб тым, што менавіта яна ўважаецца датычнай да нападу на Нацыянальны камітэт Дэмакратычнай партыі ЗША і перадвыбарчы штаб Хілары Клінтан.

Акебор дадаў, што шэраг прыкмет, такіх як звязаныя з групоўкай інтэрнэт-адрасы і стварэнне сертыфікатаў бяспекі з мэтай надаць фальшывым сайтам выгляд сапраўдных, адпавядаюць прыёмам, выкарыстаных групоўкай у дзясятках іншых выпадкаў, устаноўленых у дакладзе, у тым ліку падчас нападаў на партыю Ангелы Мэркель ХДС.

«Не магу сцвярджаць адназначна, але «адбіткі пальцаў» супадаюць», - заявіў спецыяліст.