У паветранай прасторы краін Балтыі праходзяць вучэнні NATO
- 25.04.2017, 15:34
- 14,501
У вайскова-паветраных вучэннях возьмуць удзел знішчальнікі з Нідэрландаў і Нямеччыны, самалёты з Польшчы і Нарвегіі.
У аўторак і сераду - 25 і 26 красавіка - у Балтыйскай паветранай прасторы, пераважна над Літвой, будуць праходзіць вайскова-паветраныя вучэнні NATO Ramstein Alloy, паведамляе delfi.lt са спасылкай на Міністэрства абароны Літвы.
У вучэннях возьмуць удзел знішчальнікі з Нідэрландаў і Нямеччыны, якія ўдзельнічаюць у місіі NATO для патрулявання паветранай прасторы краін Балтыі, самалёты з Польшчы і Нарвегіі, а таксама транспартныя самалёты з Літвы, ЗША і самалёты NATO для паветранай выведкі AWACS.
Удзельнікі вучэнняў будуць адпрацоўваць перахоп самалётаў, дазапраўку ў паветры, пошукава-выратавальныя аперацыі, а таксама практыку дыверсій, падыходы да розных балтыйскіх аэрадромаў.
Акрамя таго, задзейнічаная авіяцыя таксама будзе трэніраваць працэдуру перахопу COMLOSS - гэта сцэнар, пры якім грамадзянскі самалёт губляе кантакт з наземнымі дыспетчарамі і патрабуецца яго ідэнтыфікацыя ў паветры самалётамі місіі NATO.