Намеснік камандзіра вайсковай часткі пад Віцебскам налічваў прэміі і прысвойваў іх

На «прэміях» падначаленым 28-гадовы афіцэр зарабіў блізу тысячы даляраў.

Начальнік фінансавай службы адной з вайсковых частак Віцебскай вобласці абвінавачваецца ў махлярстве і крадзяжы шляхам злоўжывання службовымі паўнамоцтвамі, паведамляе БелТА.

Управай 4 красавіка скончанае расследаванне крымінальнай справы ў дачыненні да памочніка камандзіра ў фінансавым забеспячэнні - начальніка фінансавай службы адной з вайсковых частак Віцебскай вобласці паводле ч.1 арт.209, ч.4 арт.210 (махлярства; крадзеж шляхам злоўжывання службовымі паўнамоцтвамі, учынены ў асабліва значнай суме) КК.

28-гадовы начальнік фінансавай службы з красавіка да снежня 2016 года падаваў у органы дзяржаўнага казначэйства падробленыя аплатныя дакументы на выплату аднаразовай грашовай узнагароды за падаўжэнне кантрактаў 9 вайскоўцам.

Пасля ён запатрабаваў у гэтых вайскоўцаў грошы ў поўнай суме як памылкова выплачаныя. Так ён незаконна завалодаў бюджэтнымі сродкамі на агульную суму больш за Br38,3 тысяч, якія выкарыстаў на ўласнае меркаванне.

Такім жа чынам начфін незаконна выплачваў прэміяльныя, якія потым пад тым самым выглядам забіраў сабе.

З чэрвеня 2015 года да лістапада 2016 га ён налічыў на карт-рахункі 11 вайскоўцаў прэмій і ўзнагародаў на суму больш за Br2,2 тысяч.

Да абвінавачанага ўжытая мера стрымання ў выглядзе падпіскі аб нявыездзе.

Сам ён віну не прызнаў, ад дачы паказанняў адмовіўся, але прычыненую шкоду падчас следства кампенсаваў цалкам.

Арышт накладзены на аўтамабіль, кампутарную тэхніку і маёмасць па месцы жыхарства на агульную суму больш за Br28 тысяч.

Дарэчы, колькасць крадзяжоў шляхам злоўжывання службовымі паўнамоцтвамі ў першым квартале гэтага года ў параўнанні з аналагічным перыядам 2016 года вырасла з 38 да 48. Гэта адзін з самых распаўсюджаных тыпаў эканамічных злачынстваў нароўні з дачай і прыняццем хабару.