Расейская генпракуратура апраўдала Данкверта

Генпракуратура РФ не знайшла прыкмет канфлікту інтарэсаў у кіраўніка Рассельгаснагляду.

Генпракуратура Расеі не знайшла прыкмет канфлікту інтарэсаў у кіраўніка Рассельгаснагляду Сяргея Данкверта і парушэнняў у сувязі з увядзеннем службай абмежаванняў на пастаўкі мяса з шэрагу прадпрыемстваў Беларусі. Гэта вынікае з ліста Генпракуратуры на адрас цэнтра «Транспэрэнсі Інтэрнэшнл - Расея», піша tut.by.

У канцы лютага цэнтр звярнуўся ў Генпракуратуру з просьбай праверыць кіраўніка Рассельгаснагляду Сяргея Данкверта на наяўнасць неўрэгуляваных канфліктаў інтарэсаў.

«Парушэнняў забароны на ўдзел названай службовай асобы ў дзейнасці гаспадарчых суб'ектаў не ўстаноўлена, бо долі ў статутных капіталах грамадства перададзеныя ў давернае кіраванне ва ўстаноўленым законам парадку», - гаворыцца ў адказе Генпракуратуры.

У лісце таксама паведамляецца, што ўжываныя Рассельгаснаглядам захады абмежавальнага, папераджальнага і прафілактычнага характару накіраваныя на недапушчэнне і (або) ліквідацыю наступстваў парушэнняў расейскага заканадаўства.

«У гэтай сувязі пастанова Рассельгаснагляду аб увядзенні часовых абмежаванняў на пастаўкі ў РФ ялавічыны і ялавічных субпрадуктаў з прадпрыемстваў Менска і Менскай вобласці не накіраванае на абмежаванне канкурэнцыі сярод сельгасвытворцаў і на стварэнне асобных прэферэнцый канкрэтнай арганізацыі», - гаворыцца ў лісце нагляднага органа.

Нагадаем, «харчовы канфлікт» цягнецца ўжо два гады. Рассельгаснагляд перыядычна ўводзіць абмежаванні на пастаўку ў Расею прадукцыі шэрагу беларускіх прадпрыемстваў АПК.

3 лютага дыктатар заявіў, што ў дачыненні да кіраўніка Рассельгаснагляду Сяргея Данкверта трэба распачаць крымінальную справу.

«Усе гэтыя «данкверты» - людзі зацікаўленыя. У кожнага з іх велізарныя латыфундыі. Яны самі з'яўляюцца вытворцамі таго ці іншага прадукту. Ці дзесьці «страхуюць», ці дзесьці ўласнікі. Але ні коштам, ні якасцю не могуць канкураваць з беларускай прадукцыяй. Таму ўсталёўваюцца гэтыя бар'еры», - сказаў Лукашэнка.

У адказ на гэта Данкверт рэкамендаваў навесці парадак на беларускіх прадпрыемствах. 7 лютага Міністэрства ўнутраных спраў Беларусі заявіла, што праводзіцца шэраг даследчых праверак у дзеяннях, якія змяшчаюць прыкметы дыскрэдытацыі дзелавой рэпутацыі беларускіх прадпрыемстваў. 14 сакавіка ў МУС паведамілі, што праверка ў дачыненні да Данкверта «цяпер у самым разгары». У канцы сакавіка Данкверт у пісьмовай форме праз Генпракуратуру РФ адказаў на пытанні беларускіх праваахоўнікаў, падрабязна патлумачыўшы прычыны забароны на ўвоз мясной і малочнай прадукцыі з шэрагу прадпрыемстваў Беларусі.