Бацька фігуранта «справы патрыётаў»: З следчага ізалятара сын выйшаў прыгнечаным

Яўген Палтаржыцкі сёння быў адпушчаны з следчага ізалятара пад хатні арышт.

Увечары 19 траўня фігуранта «справы патрыётаў» Яўгена Палтаржыцкага перавялі з следчага ізалятара КДБ пад хатні арышт. Са слоў бацькі хлопца, з сынам ён меў магчымасць пагаварыць толькі хвілін 30, і той прынцыпова адмовіўся паведамляць хоць нешта датычнае ягонай справы, перадае «Еўрарадыё».

«Ён вярнуўся здаровым, псіхічна здаровым - я не заўважыў ніякіх змен. Ні ў паводзінах, ні ў фізічным здароўі нічога такога я не заўважыў. Адзінае, ён вельмі зацяты - нічога не кажа аб справе. Відавочна, што там былі нейкія патрабаванні, калі яго пераводзілі на хатні арышт. Я з ім гаварыў, можа, паўгадзіны. І ён пра справу нічога не казаў. Відаць, ён даваў ён падпіску, што нічога не будзе казаць».

Са слоў бацькі, 22 траўня Яўген зноў будзе сустракацца са следчым.

Яўгена Палтаржыцкага затрымалі 21 сакавіка. Спачатку хлопец абвінавачваўся ва ўдзеле ў падрыхтоўцы «масавых непарадкаў», пазней да гэтага дадалося стварэнне «незаконнага ўзброенага фармавання».

Яўген Палтаржыцкі - гісторык з адукацыі. У канцы сакавіка на БТ былі паказаныя кадры аператыўнай здымкі, на якіх ён даваў каментары пра схоў арматуры, нібыта знойдзенай у лесе следчымі ў справе «Белага легіёну». Праваабаронцы кажуць, што ў «справе патрыётаў» за кратамі застаецца 16 чалавек.