Працоўныя Гомельшчыны: Цяпер жывуць толькі камандзір і начальнік

Вёска Патапаўка, што на Гомельшчыне, дзесяцігоддзе таму налічвала амаль тысячу жыхароў.

Мясцовы саўгас забяспечваў вытворчасць малака і мяса, збожжавых, зернебабовых і кармавых культур. Сёння ж адміністрацыйны цэнтр сельсавета — у глыбокім заняпадзе, паведамляе «Белсат».

Працаўладкавацца немагчыма

«Няма вакансій ніякіх. У агульным — скарачэнні. А каго тут скарачаць? Тут 20 чалавек засталося і ўсё».

«Цяпер жывуць толькі тыя, хто камандзір і начальнік, а такім простым працы няма, заробку няма. Рабочым няма заробку».

— распавядаюць мясцовыя жыхары.

Мясцовыя жыхары выжываюць пераважна за кошт уласнай гаспадаркі або едуць працаваць у Расею.

У вёсцы амаль не засталося моладзі

Пенсіянерам, якія дажываюць тут свой век, таксама даводзіцца нялёгка. Пасля ўвядзення пенсійнай рэформы ў працоўны стаж перасталі залічваць гады дэкрэтнага адпачынку і догляду за інвалідамі. Як прыклад — Тамара Тытуленка, якая засталася і без працы, і без пенсійных адлічэнняў.

У пошуках працы многія пераехалі ў раённы цэнтр. Аднак і ў Буда-Кашалёве сітуацыя ненашмат лепшая: будаўнічую ПМК і птушкафабрыку зачынілі, а масласырзавод далучылі да Рагачоўскага малочна-кансервавага камбіната. Нешматлікія жыхары, якія маюць працу, атрымліваюць па Br200-300 у месяц.

У прычыне заняпаду мясцовыя актывісты бачаць віну ўладаў

Праблемы вёскі Патапаўка і горада Буда-Кашалёва — не адзінкавыя. Дэпрэсіўныя змены закранулі ўвесь раён: прадпрыемствы зачыняюцца, а колькасць працоўных месцаў пастаянна скарачаецца. Толькі з пачатку года рост афіцыйнага беспрацоўя ў Гомельскай вобласці склаў больш за 20%.