Міністэрства юстыцыі Украіны: Пры Януковічу з дзяржбюджэту скралі $40 мільярдаў
13- 23.05.2017, 10:36
- 12,804
У сувязі з гэтым неабходна прыняць закон аб спецканфіскацыі.
Міністр юстыцыі Украіны Павел Пятрэнка заявіў, што за тры гады прэзідэнцтва Віктара Януковіча было выкрадзена блізу 40 мільярдаў даляраў, паведамляе «Укрінформ».
У верасні мінулага года Пятрэнка заяўляў, што Януковіч вывеў з дзяржбюджэту ад 20 да 30 мільярдаў даляраў.
«Акрамя 1,1 мільярда арыштаваных ва Украіне сродкаў, якія належалі Януковічу, толькі ў экспертных ацэнках, блізу 40 мільярдаў даляраў было выкрадзена рэжымам Януковіча за 3 гады іх так званага кіравання», — сказаў ён.
Міністр дадаў, што гэтыя грошы знаходзяцца пад рознымі юрысдыкцыямі ў розных дзяржавах. Іх вывелі з краіны праз складаныя схемы.
З ягоных слоў, менавіта таму неабходна прыняць закон аб спецканфіскацыі, бо ён дае магчымасць у тым ліку праз міжнароднае супрацоўніцтва вярнуць гэтыя сродкі.
«На жаль, парламент не прыняў закон аб спецканфіскацыі і неабходнасць у ім не знікае», — адзначыў Пятрэнка.
Нагадаем, у канцы мінулага месяца паведамлялася, што суд канфіскаваў грошы атачэння Януковіча на суму 1,5 мільярда даляраў. Адвакаты адмаўляюць дачыненне Януковіча да канфіскаваных грошай. З іх слоў, у былога кіраўніка дзяржавы на рахунку ў Ашчадбанке толькі 28 мільёнаў грыўняў.