Дональд Трамп назваў няўдачнікамі арганізатараў тэракту ў Манчэстэры
- 23.05.2017, 12:16
- 6,522
ФОТА: LI MUZI / ZUMA
Прэзідэнт ЗША выказаў салідарнасць з грамадзянамі Вялікабрытаніі.
Прэзідэнт ЗША Дональд Трамп асудзіў тэракт у Манчэстэры. «Мы выказваем шчырую салідарнасць з грамадзянамі Вялікабрытаніі», - заявіў ён, выступаючы з прамовай у Бэтлееме. Тыя, хто ўчыніў гэты тэракт – «злыдні» і «няўдачнікі», дадаў ён.
«Яны злосныя няўдачнікі. Я не назаву іх монстрамі, таму што ім бы спадабалася гэта слова. Я буду называць іх няўдачнікамі з гэтага моманту», - цытуе Трампа Telegraph.
Trump: "They were evil losers. I won’t call them monsters because they would like that term. I will call them losers from now on."
— The Telegraph (@Telegraph) 23 мая 2017 г.
Нагадаем, што а 22.30 22 траўня (00.30 23 траўня паводле менскага часу) на ангельскім стадыёне «Манчэстэр Арэна» амаль адразу пасля заканчэння канцэрта амерыканскай спявачкі Арыяны Грандэ прагрымеў выбух. Паводле апошніх звестак, загінулі 22 чалавекі, 59 паранена. Адказнасць за тэракт узяла на сябе «Ісламская дзяржава».
