Аўтар петыцыі супраць крэдыту МВФ для Лукашэнкі: Наш голас быў пачуты

Рэжым не павінен атрымліваць ніякай фінансавай дапамогі, пакуль дыктатар знаходзіцца ва ўладзе.

Петыцыя да Міжнароднага валютнага фонду на сайце change.org, якую падпісалі некалькі тысяч чалавек, сёння была перададзеная ў МВФ. Дзяніс Казакевіч распавёў сайту Charter97.org аб cтворанай ім ініцыятыве:

- Вы - аўтар петыцыі да МВФ з заклікам не фінансаваць рэжым Лукашэнкі. Раскажыце аб асноўных патрабаваннях гэтага дакумента?

- Петыцыя складаецца з двух асноўных патрабаванняў. Першае - спыненне перамоваў, уключаючы кансультацыі, з урадам Беларусі, пакуль не будуць вызваленыя ўсе затрыманыя падчас мірных акцый пратэсту. Асноўная частка ліста петыцыі звязаная з іншым патрабаваннем - не выдаваць ніякай фінансавай дапамогі Беларусі, пакуль Лукашэнка застаецца ва ўладзе.

- Вы сёння перадалі петыцыю ў МВФ. Раскажыце, з кім вы сустракаліся і як паставіліся да вашай ініцыятывы прадстаўнікі фонду?

- Я сустракаўся з вельмі цікавым чалавекам, дырэктарам Еўрапейскага офіса МВФ Джэфры Фрэнксам. Ён з'яўляецца выпускніком адначасова і Прыстанскага, і Гарвардскага, і Оксфардскага ўніверсітэтаў. Джэфры Фрэнкс ужо 24 гады працуе ў структурах МВФ і цяпер займае вось такую важную пасаду. Cама працэдура перадачы была кароткай. Але наш голас быў пачуты і ўважаю гэта за маленькую перамогу.

- Вы ўжо доўгі час не жывяце ў Беларусі, ніколі не займаліся грамадскай і палітычнай дзейнасцю. Што прымусіла вас актыўна дзейнічаць цяпер?

- Так дастаў ён. Баста! Думаю я не адзін такі. Хоць я не пражываю на тэрыторыі Беларусі, але сачу за навінамі і абураны беззаконнем, якое адбываецца ў Беларусі.

Вернемся да падзей гэтай вясны. Абурыла, калі падчас акцый пратэсту людзі ў цывільным хапалі менчукоў і кідалі ў аўтобусы. На вуліцах мірнага горада адбываўся тэрор. Мяне ўразілі затрыманне Змітра Дашкевіча, абарона Курапатаў, уразіла, як Сяргей Пальчэўскі прыкаваў сябе кайданкамі да грузавіка. З аднаго боку быў гераізм беларусаў, c другога - нахабны цынізм рэжыму і спроба запалохаць людзей.

У разгар пратэстаў, 16 сакавіка, шэф місіі МВФ у Беларусі Пітэр Долман асабіста сустракаўся з Лукашэнкам. Сустрэча адбывалася падчас таго, як ва ўсёй Беларусі праходзілі затрыманні. Гэта мяне і падштурхнула да напісання петыцыі. Першасным патрабаваннем было спыніць перамовы з рэжымам, пакуль за кратамі знаходзяцца фігуранты «справы патрыётаў» (на жаль, яно дагэтуль актуальнае, бо яны знаходзяцца за кратамі). Cотні людзей пачалі падпісвацца пад петыцыяй і пакідаць каментары, падключыліся эканамісты, якія дапамаглі мадыфікаваць гэты зварот і скласці спецыяльнае петыцыйны ліст. У ім ужо былі выкладзеныя выразныя падставы, чаму нельга даваць грошы рэжыму Лукашэнкі.