Студэнтка з Віцебска стала «Каралевай вясны-2017»
- 24.05.2017, 9:58
- 15,270
Удзельніцы спявалі ў вышыванках і стваралі карціны за тры хвіліны.
Увечары, 23 траўня ў менскім Prime Hall прайшоў фінал XXVI Міжнароднага міжвузаўскага конкурсу грацыі і артыстычнага майстэрства «Каралева Вясна - 2017». За карону змагаліся да 15 самых артыстычных і прыгожых студэнтак беларускіх ВНУ - з Менска, Магілёва, Віцебска, Гомеля, Горадні, Мазыра, Полацка, піша kp.by.
Фінал конкурсу прымеркавалі да года навукі. Удзельніцы спрабавалі зазірнуць у будучыню і адказвалі на пытанні, якім яны бачаць 3017 год.
- Акрамя тэлепорту ў нас будуць сумкі, у якіх рэчы можна знайсці па галасавым сігнале, а таксама шкарпэткі на магніце, - уяўляе ўдзельніца.
Затым пачаліся творчыя нумары. Удзельніцы спявалі ў вышыванках, чыталі рэп пра Беларусь, стваралі карціны за тры хвіліны, танчылі тверк і лаціну, спявалі песні з папулярных фільмаў і нават мульцікаў. А, напрыклад, Наталля Самойлава прысвяціла выступ свайму бацьку, склаўшы маналог пра яго.
Аднак які ж конкурс прыгажосці без дэфіле! Іх было цэлых 5 - у белых кактэйльных сукенках, «касмічным» адзенні, акадэмічных мантыях з рознымі чароўнымі прадметамі, у беларускіх строях і вячэрніх сукенках.
Журы аддала перамогу студэнтцы 4 курса Віцебскага дзяржаўнага тэхналагічнага ўніверсітэта Сняжане Міхейцавай. Дарэчы, гэта ВНУ славіцца сваімі поспехамі на конкурсе «Каралева Вясна». Ужо не першы раз карону атрымлівае студэнтка ВДТУ. Дарэчы, у сваім творчым нумары яна з вянком на галаве спявала песню пра родную краіну, а ў сярэдзіне нават зачытала рэп.
Студэнтка Гарадзенскага дзяржаўнага ўніверсітэта ім. Янкі Купалы атрымала тытул першай віцэ-міс. На трэцім месцы - прадстаўніца Полацкага дзяржаўнага ўніверсітэта Крысціна Нікіфарава.