Беларускія праграмісты выйшлі ў фінал Imagine Cup 2017

Пераможца фінальнага этапу атрымае грант на суму $100 тысяч на развіццё праекта.

Беларуская каманда Scrawlless выйшла ў фінал Imagine Cup 2017, які пройдзе ў Сіэтле ў ліпені, паведамілі БелТА у прадстаўніцтве кампаніі Microsoft у Беларусі.

У паўфінале Imagine Cup у Кіеве ўзялі ўдзел дзевяць каманд з сямі краін - Украіны, Беларусі, Казахстана, Азербайджана, Грузіі, Эстоніі і Літвы. Першымі сталі беларускія распрацоўнікі з каманды Scrawlless, другімі - хлопцы з Азербайджана, трэцімі - каманда з Грузіі.

Беларускія ІТ-распрацоўнікі возьмуць удзел у змаганні паміж 50 камандамі з розных краін падчас міжнароднага фіналу конкурсу, які адбудзецца ў ліпені ў горадзе Сіэтл (ЗША). Пераможца фінальнага этапу атрымае грант на суму $100 тысяч на развіццё праекта.

Каманда Scrawlless прэзентавала інтэрнэт-партал для дзяцей з ДЦП і парушэннямі дробнай маторыкі рук. Партал адаптаваны да праграмы беларускіх школ. З яго дапамогай дзеці, якім праз асаблівасці фізічнага развіцця складана пісаць тэкст і рысаваць, змогуць выконваць хатнія заданні ў алгебры і геаметрыі. У партал усталяваныя модулі для развязання прыкладаў з опцыямі вылічэння ў слупок і поле для рысавання геаметрычных фігур. Партал будзе карысны школьнікам, якія знаходзяцца на хатнім навучанні: з дапамогай сэрвісу можна адпраўляць хатнія заданні настаўніку і задаваць яму пытанні онлайн. Распрацоўнікі сцвярджаюць, што ў праекта вялікая будучыня: яго можна адаптаваць да школьных праграмах розных краін і дапамагаць дзецям ва ўсім свеце.

У гэтым годзе конкурс Imagine Cup адзначае 15-гадовы юбілей. За гэты перыяд у спаборніцтвах узялі ўдзел больш за 2 млн студэнтаў з 190 краін.