Літва просіць замежных дыпламатаў аб падтрымцы ў пытанні БелАЭС
3- 26.05.2017, 17:26
- 13,866
Пытанні бяспекі Астравецкай АЭС павінны быць адданыя галоснасці.
Літва просіць дыпламатаў замежных краін аб падтрымцы ў справе прыпынення будаўніцтва Беларускай АЭС у Астраўцы (БелАЭС) і наданні галоснасці пытанням бяспекі станцыі, піша delfi.lt.
У пятніцу ў Віленскім раёне, у Буйвіджай, што побач з беларускай мяжой, адбылося выязное пасяджэнне, на якім прадстаўнікі Літвы папрасілі ў дыпламатаў больш чым 20 краін падтрымкі на сустрэчы канвенцыі Эспоо, якая адбудзецца ў чэрвені ў Менску.
«Літва просіць аб падтрымцы нашай пазіцыі, пра тое, што павінна быць не двухбаковая літоўска-беларуская група, а міжнародная група экспэртаў, якая б ацаніла пытанні бяспекі», - заявіў на дыскусіі міністр навакольнага асяроддзя Кястуціс Навіцкас.
Пасол Латвіі ў Літве Эйнарс Семаніс заявіў, што Латвія падтрымлівае Літву ў імкненні забяспечыць захаванне стандартаў бяспекі на БелАЭС.
«Мы, вядома, падзяляем заклапочанасць, якая звязаная з працэсам будаўніцтва і стандартамі бяспекі на БелАЭС, і мы падымаем гэтыя пытанні на міжнародным узроўні. (...) Станцыя сапраўды павінна адказваць усім розным і важным патрабаванням міжнародных канвенцый - напрыклад, Эспоо, Орхуса. У гэтым пытанні мы сапраўды салідарныя з Літвой», - сказаў пасол журналістам у пятніцу.
«Мы самі цяпер працуем з Беларуссю, каб укласці пагадненне аб абмене інфармацыяй аб атамнай бяспекі», - дадаў ён. У пасяджэнні таксама бралі ўдзел паслы Латвіі, Італіі, Швэцыі, Чэхіі, Злучанага Каралеўства, Малдовы, Нідэрландаў, Румыніі. Сваіх прадстаўнікоў таксама даслалі амбасады Харватыі, Фінляндыі, Японіі, Гішпаніі, Канады, Францыі, Нарвегіі, Польшчы, ЗША, Турцыі.