Чаму вайну на Данбасе дагэтуль называюць АТА

«Гібрыдная» вайна ахоплівае ўсе сферы жыццядзейнасці Украіны.

Але чацвёрты год вайну на ўсходзе Украіны па-ранейшаму называюць «антытэрарыстычнай аперацыяй», таму што ўлады думаюць у катэгорыях эканамічных выгод і электаральных пераваг.

Пра гэта дырэктар вайсковых праграм Цэнтра Разумкова Мікалай Сунгуроўскі распавёў у размове «Главреду».

«На мой погляд, гэта з'яўляецца прынцыповым пытаннем, з пункту гледжання і ўнутранага, і замежнага ўспрымання гэтага канфлікту. Ад чаго залежыць не толькі стаўленне да яго, але і паводзіны ў ім як непасрэдных удзельнікаў, так і трэціх бакоў», - кажа вайсковы экспэрт.

На ягоную думку, з самага пачатку гэтага канфлікту ўкраінская ўлада пайшла на парушэнне нацыянальнага заканадаўства: «Арт. 4 Закона Украіны «Пра абарону» выразна прапісвае дзеянні прэзідэнта ў гэтым выпадку - увядзенне вайсковага становішча. Але паколькі наша палітычнае кіраўніцтва звыкла мысліць у катэгорыях эканамічных выгод і электаральных пераваг, то пайсці на гэта яно, натуральна, не магло. Усе заявы аб увядзенні такога становішча ў выпадку інтэнсіфікацыі канфлікту не былі пацверджаны дзеяннямі. былі і інтэнсіфікацыі, і ахвяры, эканамічныя страты - не было толькі гатоўнасці і рашучасці пайсці на бескампрамісныя дзеянні ў абароне нацыянальных інтарэсаў. У многіх выпадках роля дзяржавы была ў гэтых адносінах кампенсаваная роляй грамадзянскай супольнасці - добраахвотніцкіх і валанцёрскіх рухаў».

«Нельга казаць пра адсутнасць вайны і патрабаваць ад грамадства мабілізацыі. Тым больш, што на PR-узроўні вайна быццам бы і не адмаўляецца, але як толькі размова пераходзіць у прававую і эканамічную сферу, яна ператвараецца ў антытэрарыстычную аперацыю. У такіх умовах ўлада не мае права патрабаваць ад грамадства ні даверу, ні павагі да сябе, ні, тым больш, той самай мабілізацыі, якая неабходна для перамогі над ворагам. Улада часта апраўдвае сваю спробу адысці ад неабходнасці ўвядзення вайсковага становішча тым, што ў гэтым выпадку Украіне нібыта МВФ не дасць крэдыты. Але такіх патрабаванняў МВФ да Украіны не выказваў, тым больш, што вайсковае становішча можа быць уведзена на частцы тэрыторыі краіны, у той час як астатняя частка будзе займацца вяртаннем крэдытаў. Хоць, у прынцыпе, «гібрыдная» вайна ахоплівае ўсе сферы жыццядзейнасці і, адпаведна, часткі краіны, і, фактычна, з'яўляецца татальнай, а ніяк не лакальнай», - падсумаваў дырэктар вайсковых праграм Цэнтра Разумкова.