У Пермскім краі разбіўся пікап з вахтавікамі з Беларусі

Трое беларусаў загінулі, чацвёра пацярпелі.

27 траўня ў горадзе Бярэзніках Пермскага краю Расейскай Федэрацыі адбылася лабавая аварыя з удзелам пікапа Mitsubishi L200 і аўтобуса Уралкалію.

Інфармацыя пра аварыю з'явілася ў супольнасці «Тыповыя Бярэзнікі». У каментарах да навіны карыстальнікі сацыяльных сетак пішуць, што пікап быў з беларускімі «нумарамі». Пра тое, што загінулыя, магчыма, з'яўляюцца грамадзянамі Беларусі, abw.by паведаміў сведка наступстваў гэтай страшнай аварыі. Карыстальнікі сацыяльных сетак кажуць аб трох целах, убачаных імі на месцы аварыі, як мяркуецца, усе яны - з пікапа.

Mitsubishi выехаў на сустрэчную паласу і рэзнуўся ў аўтобус, у якім працаўнікі прадпрыемства вярталіся дадому. Каментатары адзначаюць, што не раз бачылі L200 у горадзе, яго кіроўца адрозніваўся неспакойным паводзінамі.

Як паведамляе прэс-служба ГУ МУС Расеі Пермскага краю, ДТЗ адбылося 27 траўня а 19.50 у горадзе Бярэзніках на вуліцы Пяцігодкі. 29-гадовы кіроўца аўтамабіля Mitsubishi L200 выехаў на паласу сустрэчнага руху і сутыкнуўся з аўтобусам МАЗ. У выніку ДТЗ кіроўца пікапа і два ягоныя пасажыры 32 і 34 гадоў памерлі на месцы.

Яшчэ двое пасажыраў шпіталізаваныя з траўмамі рознай ступені цяжкасці.

Таксама траўмы атрымалі два пасажыры аўтобуса, іх даставілі ў лякарню.

Як пішуць карыстальнікі сацыяльных сетак, загінулыя былі грамадзянамі Рэспублікі Беларусь і прыехалі ў Пермскі край на вахту.

Як распавёў progorod59.ru калега беларусаў Юрый, мужчыны 1,5 года ў Пермскім краі. Яны працавалі на «ЕўраХіме» і Салікамскім «Уралкаліі» вахтай па некалькі месяцаў. Зусім нядаўна яны прыступілі да сваёй змены.

У аварыі, акрамя рабочых з Беларусі, пацярпелі і пасажыры аўтобуса: 57-гадовая жанчына і 36-гадовы мужчына. Яны таксама ў лякарні.