Тылерсан дамовіўся з Японіяй узмацніць ціск на КНДР
- 29.05.2017, 9:56
- 15,734
Рэакцыя рушыла ўслед адразу ж пасля ранішняга запуску новай ракеты з боку Паўночнай Карэі.
Міністр замежных спраў Японіі Фуміа Кісіда і дзяржсакратар ЗША Рэкс Тылерсан абмеркавалі ў панядзелак праз тэлефон чарговы ракетны запуск КНДР, паведамляе ТАСС.
Адзначаецца, што бакі дамовіліся ўзмацніць ціск на КНДР. Кіраўнікі замежнапалітычных ведамстваў таксама дамовіліся патрабаваць ад Кітая выконваць большую ролю ў пытанні ўрэгулявання сітуацыі на Карэйскім паўвостраве.
Прэм'ер-міністр Японіі Сіндзо Абэ заявіў, што ўрад краіны мае намер узмацніць ціск на КНДР шляхам, між іншым, прыняцця новых санкцый.
«Мы станем узмацняць у супрацоўніцтве з ЗША і Паўднёвай Карэяй ціск на Паўночную Карэю шляхам новых санкцый і ўзаемадзеяння на ўзроўні ААН», - сказаў ён.
Японскі прэм'ер не ўдакладніў, якія санкцыі ён мае на ўвазе.
Токіа раней фактычна забараніў гандаль з КНДР, перапыніў з ёй усе віды прамых транспартных зносін, увёў жорсткія візавыя абмежаванні, не дазваляе заходы ў свае парты судам, якія раней наведвалі гавані на поўначы Карэі.
Як паведаміла ў панядзелак міністэрства абароны Японіі, КНДР 29 траўня запусціла ракету малой далёкасці серыі Scud. Яна праляцела прыкладна 450 км і ўпала ў межах японскай выключнай эканамічнай зоны. Токіа па дыпламатычных каналах заявіла Пхеньяну пратэст, назваўшы ракетны запуск прамым парушэннем дзейных рэзалюцыяў Рады Бяспекі ААН.