Лукашэнка: Грошай на парад шкадаваць не трэба

Дыктатар даручыў пераканаць людзей, што сілавікі нездарма ядуць «вайсковы хлеб».

Аляксандр Лукашэнка, заслухоўваючы сёння даклад пра правядзенне вайсковага параду да Дня Незалежнасці, даручыў арганізаваць яго на высокім узроўні, паведамляе БелТА.

«Мы прынялі пастанову, што праводзім парад у гэтым годзе. Сродкаў на гэта шкадаваць не трэба, тым больш яны не такія ўжо і вялікія, - сказаў Аляксандр Лукашэнка. - Ён павінен быць сапраўдным парадам, уражлівым. Для гэтага і праводзіцца. Гэта дэманстрацыя, мы паказваем людзям, што мы нездарма ямо вайсковы хлеб».

Як падкрэсліў кіраўнік дзяржавы, народ павінен бачыць, што такое беларускае войска, чым яно займаецца, што маецца на ўзбраенні. «І ўбачыць твар сваіх абаронцаў, вайскоўцаў Узброеных Сіл, - дадаў ён. - Не толькі войска, але і памежнікаў, і МУС, і МНС».

На думку Лукашэнкі, на парадзе неабходна прадэманстраваць сучасныя ўзоры грамадзянскай тэхнікі, якія вырабляюцца ў краіне. «Мяне турбуе, што нашы людзі (не ўсе, а значная частка) не ведаюць, чым жыве грамадзянская Беларусь, што мы ствараем нават у гэтыя складаныя, няпростыя часы. Бо ёсць, што паказаць. І гэта надоўга застаецца ў памяці людзей», - адзначыў Лукашэнка.