Шуневіч пракаментаваў міліцэйскі бунт у Крычаве
32- 5.05.2017, 9:54
- 22,071
Міністр асабліва ўстрывожыўся, што сітуацыя стала здабыткам незалежных СМІ.
Міністр унутраных спраў Беларусі Ігар Шуневіч пракаментаваў БелТА сітуацыю ў Крычаўскім РАУС.
«Міністэрствам унутраных спраў Беларусі скончана службовая праверка. У выніку намі ўстаноўлены парушэнні дысцыпліны і ведамасных нарматыўных актаў як з боку кіраўніка раённага аддзела, так і з боку скаржніка, які з'яўляецца фігурантам гэтай праверкі, - паінфармаваў міністр. - У выніку абодва прыцягнутыя да дысцыплінарнай адказнасці».
Акрамя таго, прызначаная яшчэ адна службовая праверка паводле факта распаўсюду інфармацыі ў СМІ з парушэннямі патрабаванняў унутраных нарматыўна-прававых актаў МУС.
З улікам наяўнасці ў скаржніка дзейнага дысцыплінарнага спагнання, ён можа быць звольнены з органаў унутраных спраў за дыскрэдытацыю міліцыі, калі паводле вынікаў праверкі будзе даведзеная яго віна.
«Сама сітуацыя ўзятая на кантроль, матэрыялы першай праверкі вылучаныя ў асобную вытворчасць і накіраваныя ў падраздзяленне Следчага камітэта для дачы прававой ацэнкі», - адзначыў Ігар Шуневіч.
З ягоных слоў, агульны маральна-псіхалагічны клімат у Крычаўскім РАУС досыць спакойны, ураўнаважаны і працоўны. «Сітуацыя лакалізаваная», - рэзюмаваў міністр.
Нагадаем, гаворка ідзе пра супрацоўнікаў Крычаўскага РАУС на чале з падпалкоўнікам Ігарам Вусікам, якія ў лісце міністру ўнутраных спраў заяўляюць: іх правы парушаюцца. З іх слоў, кіраўнік РАУС дазваляе сабе нецэнзурныя абразы ў адрас падначаленых, прадузята ставіцца да ўчастковых інспектараў, а сістэма заахвочванняў і пакаранняў несправядлівая.