Былы агент КДБ раскрыў метады спецслужбаў у дачыненні да Charter97.org 

Сяргей Васільеў, які ўцёк у Польшчу, распавёў новыя падрабязнасці пра сакрэты «чэкістаў»

Чарговы скандал успыхнуў вакол КДБ. На гэты раз былы агент спецслужбаў Сяргей Васільеў, які ўцёк у Польшчу, адкрыў новыя падрабязнасці, якім чынам у Беларусі дыскрэдытуюць прадстаўнікоў дэмакратычнага руху. Справа тычылася гомельскіх актывістаў і скандальнага сайта gomelbest.com. Заява былога агента на мянушку Сымон выклікала абурэнне сярод апазіцыі. Сам КДБ інцыдэнт каментаваць адмаўляецца, паведамляе «Белсат».

Cупрацоўніцтва з КДБ жыхар Гомеля Сяргей Васільеў пачаў больш за 20 гадоў таму. Спачатку ягоным заданнем было выяўленне прызыўнікоў, якія ўхіляліся ад службы ў войску, пасля дапамагаў спецслужбам у барацьбе з наркадылерамі. Сваю ролю агента на мянушку Сымон ён уважаў за жыццёвую місію.

«Я не бачыў у гэтым нічога дрэннага. Я хацеў працаваць у міліцыі, мяне не ўзялі. Я падумаў, што можа такім чынам я змагу зрабіць нешта добрае», - кажа Сяргей Васільеў.

Аднак неўзабаве адкрыўся іншы фронт барацьбы - з апазіцыяй. Цяпер задачай Васільева была «праца» з іншадумцамі. Яе галоўны момант - гэта стварэнне сайта gomelbest.com. Інтэрнэт-крыніцу трэба было ствараць пад выглядам «незалежнага СМІ». Напраўду сайт займаўся публікацыямі-пасквілямі, якія дыскрэдытавалі прадстаўнікоў гомельскага дэмакратычнага руху.

«Мая задача была зрабіць сэрвер, размясціць сайт і сачыць каб ён заўсёды працаваў, а яны будуць самі размяшчаць інфармацыю на ім. Я павінен быў аплачваць паслугі, для гэтага (і за маю працу) яны давалі мне грошы», - кажа Сяргей Васільеў.

Тыя, хто асабіста сутыкнуўся з «дзейнасцю» gomelbest.com, гадамі не маглі дайсці да праўды. Скардзіцца не было на каго, аўтары абразлівых публікацый афіцыйна не існавалі. Прадстаўнікі апазіцыйнага руху Гомеля адкрыта кажуць, што інфармацыя на сайце многім зламала жыццё. Некаторыя праз Васільева маглі трапіць за краты.

«Я ўпэўнены, што гэты чалавек узламаў маю асабістую старонку, паштовую скрыню і ад майго імя разаслаў парнаграфію ў падатковую і следчы камітэт», - распавядае праваабаронца Леанід Судаленка.

А так выглядалі частыя сустрэчы Сяргея Васільева з работнікамі КДБ. Перадача грошай, дазаваная інфармацыі аб унутранай палітыцы ў структуры.

«Прыйшоў Вакульчык і наважыў, што ўся інфармацыйная бяспека - гэта размяшчэнне артыкулаў і каментароў».

Былы сексот таксама распавёў аб метадах інфармацыйнай вайны з незалежнымі СМІ.

«Charter97.org публікуе артыкул, перастаўляем словы, размяшчаем амаль тое ж, але сэнс ад гэтага мяняецца», - распавядае куратар Сяргея Васільева.

Пакуль у КДБ адмаўляюцца каментаваць прызнанні свайго былога агента. На пытанні «Белсата» адказу не было.

«Я толькі магу параіць вам сачыць за нашым сайтам. Калі нешта з'явіцца, мы апублікуем», - адказаў афіцыйны прадстаўнік КДБ Дзмітрый Пабяржын.

Сам Васільеў у Беларусь вяртацца не збіраецца. Вядома, на радзіме яму пагражае крымінальная адказнасць. Са слоў былога агента ён ужо мае сталы від жыхарства ў Польшчы і спадзяецца атрымаць грамадзянства. Ці павінна краіна Еўразвязу даваць прытулак такому чалавеку?

«Мяне не турбуе, чыё заданне ён выконваў. Я хачу, каб ён пакаяўся публічна ў тым, што ён рабіў. Не толькі, што цяпер сказаў. Бо гэта пакуль толькі вяршыня айсберга. Каб кожны агент, які заходзіць сюды ў офіс, ведаў, што рана ці позна дрэнна скончыць», - распавядае праваабаронца Леанід Судаленка.

Супрацоўніцтва з КДБ Сяргей Васільеў спыніў летась. Скончыў сваю дзейнасць і сайт gomelbest.com.

«Каб усе даведаліся, як працуе КДБ, якімі метадамі дасягаюць свае мэты. Праца сучаснага беларускага КДБ нічым не адрозніваецца ад часоў СССР», - кажа былы агент КДБ.

Скандал вакол КДБ - далёка не першы апошнім часам. Пра тое, што адбываецца ўнутры структуры, а таксама на самых высокіх узроўнях улады стала вядома нядаўна з вуснаў былога маёра КДБ Андрэя Моўчана, якому ўдалося ўцячы ў Швэцыю.