У адміністрацыі Трампа распрацавалі новы план што да РФ

Сакрэтныя дакументы дзяржсакратара ЗША Рэкса Тылерсана прадугледжваюць тры асноўныя пункты.

Сакрэтныя дакументы дзяржсакратара ЗША Рэкса Тылерсана сведчаць аб тым, што Дзярждэпартамент выпрацаваў новы план у дачыненні да Расеі, паведамляе выданне BuzzFeed (пераклад - «Нямецкая хваля»).

Дзяржсакратар ЗША Рэкс Тылерсан распрацаваў канцэпцыю будучых амерыкана-расейскіх узаемастасункаў з трох пунктаў. У яе рамках мяркуецца выбудоўваць канструктыўныя працоўныя дачыненні з РФ у абмежаваным спісе тэм. Пра гэта паведамляе інтэрнэт-выданне BuzzFeed у панядзелак, 19 чэрвеня. Звесткі аб гэтым сакрэтным дакуменце публікуюцца ўпершыню.

Першым пунктам плана з'яўляецца давядзенне да ведама Масквы, што агрэсіўныя дзеянні ў дачыненні да ЗША - гэта пройгрышны варыянт, які будзе контрпрадуктыўным для абодвух бакоў. У выпадку, калі РФ ужыве рашучыя захады, якія супярэчаць інтарэсам ЗША, напрыклад, пастаўкі зброі афганскім талібам або пераслед амерыканскіх дыпламатаў у Маскве, Вашынгтон дасць адпаведны адказ, паведаміў выданню чыноўнік ЗША, знаёмы з тэкстам дакумента.

Другі пункт плана Тылерсана - супрацоўніцтва ў пытаннях, якія з'яўляюцца стратэгічна важнымі для ЗША, у лік якіх уваходзіць мірнае ўрэгуляванне ў Сірыі, прыпыненне развіцця атамнай праграмы КНДР, барацьба з кібершпіянажам і кібербяспека. Дзяржсакратар ЗША мае намер прыпыніць рост гандлю паміж РФ і Паўночнай Карэяй і наладзіць з Масквой каардынацыю дзеянняў у барацьбе з тэрарыстычнай групоўкай «Ісламская дзяржава» ў Сірыі. У той жа час незразумела, якімі спосабамі ён мае намер гэтага дасягнуць, піша выданне. Акрамя таго, Вашынгтон і Масква валодаюць выдасканаленым арсеналам кіберзброі, але пры гэтым не дасягнулі дамоўленасцей аб тым, што з'яўляецца сумленнай гульнёй, а што не, паказала крыніца выдання.

Трэцім блокам на парадку Тылерсана з'яўляецца пытанне дасягнення «стратэгічнай стабільнасці» ў стасунках з Расеяй - тэрмін, які ўключае ў сябе спектр доўгачасовых узаемных геапалітычных мэтаў.

Аднак назіральнікі не ўпэўненыя, што прэзідэнт ЗША Дональд Трамп ухваліць гэты план.

15 чэрвеня Сенат ЗША зацвердзіў законапраект аб увядзенні новых санкцый у дачыненні да РФ. Ухвалены Сенатам дакумент таксама дазваляе Кангрэсу ЗША праверыць усякую пастанову Белага дома аб прыпыненні альбо скасаванні штрафных захадаў.