Як МАЗ ледзь не «трапіў» на $100 мільёнаў

Сталі вядомыя падрабязнасці найбуйнейшай афёры, у эпіцэнтры якой апынуўся Менскі аўтазавод.

Пра тое, што МАЗ падманулі ва Украіне на прыстойную суму, стала вядома восенню мінулага года з афіцыйнага паведамлення Службы бяспекі Украіны.

У 2013 годзе кіраўнікі ўкраінскай камерцыйнай структуры заключылі дамову з прадстаўніком ААТ «Менскі аўтамабільны завод» ва Украіне на пастаўку 150 грузавых аўтамабіляў маркі МАЗ і прычэпаў да іх коштам больш за 15 млн. даляраў ЗША. Атрыманыя грузавікі былі прададзеныя іншым прадпрыемствам, а грошы ашуканцы прысвоілі, піша belaruspartisan.org.

18 і 19 кастрычніка 2016 года аператыўнікі СБУ з прыцягненнем спецыялістаў МАЗ правялі шэраг ператрусаў на аўтатранспартных прадпрыемствах Хмяльніцкай, Запарожскай, Мікалаеўскай, Чаркаскай, Кіраваградскай і Чарнігаўскай абласцей. Паводле вынікаў ператрусаў канфіскавана 100 грузавікоў, якія знаходзіліся ў вышуку. У студзені гэтага года супрацоўнікі СБУ знайшлі тыя паўсотні машын, што засталіся, украдзеныя ў Менскага аўтазавода з дапамогай ашуканскай схемы.

Следства па крымінальнай справе, распачатае паводле ч. 4 арт. 190 (махлярства, учыненае ў асабліва буйных памерах арганізаванай групай) КК Украіны. Справа знаходзіцца ў вытворчасці следчай групы Галоўнага следчага ўпраўлення Нацыянальнай паліцыі Украіны, курыруе яе Генеральная пракуратура.

Па звестках журналістаў, кантракт паміж ААТ «Менскі аўтамабільны завод» і ТАА «РАНТ» (Украіна) быў заключаны 25 траўня 2013 года. Прадмет дамовы: выраб і перадача ва ўласнасці украінскай кампаніі аўтамабіляў МАЗ-6501А8-325-000 у колькасці 1 тыс. шт. і яшчэ 1 тыс. шт. прычэпаў МАЗ-856103- 010.

Агульны кошт кантракту склаў 100 млн. 200 тыс. даляраў ЗША. Можна ўявіць, як радаваліся такому поспеху топ-мэнэджары аўтазавода і Міністэрства прамысловасці!

Паводле ўмоваў кантракту, пакупнік павінен быў зрабіць аплату тавару на працягу 180 каляндарных дзён з дня адгрузкі кожнай яго адзінкі, а таксама абавязаўся даць банкаўскую гарантыю на кошт гатовай да адгрузкі аўтатэхнікі тэрмінам дзеяння да 200 каляндарных дзён з даты адгрузкі апошняй адзінкі тавару.

ТАА «РАНТ» свае абавязанні не выканаў - гарантый не даў і ні цэнта не заплаціў даверлівым беларусам за пастаўленую партыю МАЗаў і прычэпаў, па 150 шт., на суму 15 млн. 030 тыс. даляраў ЗША.

Следствам устаноўлена, што асобы, звязаныя з украінскай кампаніяй, «шляхам складання падробленых дакументаў, па якіх у ТАА «РАНТ» узнікла фіктыўная запазычанасць перад іншымі суб'ектамі гаспадарання, і далейшага іх выкарыстання ў судах, складаючы міравыя пагадненні, перадалі 100 адзінак атрыманай ад ААТ «Менскі аўтамабільны завод» аўтатэхнікі ў кошт выплаты гэтага абавязку, які значна меншы за яго кошт.

У матэрыялах крымінальнай справы паведамляецца, што «ў выніку ашуканскіх дзеянняў неўстаноўленымі асобамі ААТ «Менскі аўтамабільны завод» нанесеная матэрыяльная шкода на суму 15 млн. 030 тыс. даляраў ЗША».

Следства працягваецца.