Красавіцкае сальда паставіла антырэкорд - мінус $90 мільёнаў

Самы прыкметны пралом у экспартных даходах краіны прабілі нафта і нафтапрадукты, калійныя і азотныя ўгнаенні, металапрадукцыя.

Беларусь у студзені-красавіку гэтага года павялічыла экспарт тавараў і паслуг на 19,5% у параўнанні з аналагічным перыядам мінулага года да 10,4 млрд даляраў, імпарт вырас на 16,3%, да 10,3 млрд, піша tut.by са спасылкай на Белстат.

Сальда замежнага гандлю таварамі і паслугамі паводле вынікаў чатырох месяцаў склалася дадатнае ў суме 120,5 млн даляраў (у студзені-красавіку 2016 года сальда было адмоўнае і складала 135,1 млн даляраў). Аднак у красавіку сітуацыя была менш аптымістычнай - сальда было адмоўным у суме 90,1 млн даляраў. Дагэтуль у гэтым годзе адмоўнае сальда было толькі ў студзені (мінус 27,7 млн даляраў).

Экспарт тавараў за студзень-красавік вырас на 21,3%, да 8,236 млрд. даляраў. Пры гэтым коштавая кан'юнктура ў некаторых экспартных таварах была не самая спрыяльная, па іншых - наадварот. Між іншых, экспарт нафтапрадуктаў знізіўся праз непаразуменне з Расеяй на 42%, да 3,6 мільёна тон, пры гэтым сярэдняя цана паставак вырасла на 67,8% да 431 даляра за тону. З экспартам хлоркалію сітуацыя адваротная - фізічныя аб'ёмы выраслі на 51,4%, да 2,1 млн тон, кошт - знізіўся на 15,7% да 338 даляраў за тону. Пастаўкі малака і малочнай прадукцыі знізіліся ў натуральным выражэнні на 10,4%, да 312,5 тысяч тон, але кошты выраслі на 47,9%.

У 2016 годзе экспарт тавараў і паслуг у Беларусі знізіўся на 9,3%, да 29,758 млрд даляраў, імпарт тавараў і паслуг летась упаў на 8,8%, да 29,808 млрд. Год Беларусь завяршыла з адмоўным сальда гандлю таварамі і паслугамі - мінус 49,8 млн даляраў.

Сярод пазіцый, што прабілі самы прыкметны пралом у экспартных даходах краіны, - нафта і нафтапрадукты, калійныя і азотныя ўгнаенні, некаторыя віды металапрадукцыі. Прырост забяспечылі легкавушкі і трохі палепшаныя пасля леташняга падзення пастаўкі іншай аўтатэхнікі, а таксама прадукцыя дрэваапрацоўкі і малочная прадукцыя.