Праз «Гульні тронаў» пачаўся турыстычны бум у Ісландыю

Чацвёрты сезон серыяла здымаўся ў Ісландыі ў 2011-2013 гадах, а цяпер там праходзяць здымкі некаторых серый апошняга сезону.

У Ісландыі за год рэзка ўзрос кошт кароткатэрміновага найму жылля, паведамляе міжнароднае агенцтва навінаў Bloomberg (пераклад - РБК). Гэта адбылося дзякуючы наплыву турыстаў, выкліканаму здымкамі серыяла «Гульня прастолаў», мяркуе агенцтва. Чацвёрты сезон серыяла здымаўся ў Ісландыі ў 2011-2013 гадах, а цяпер там праходзяць здымкі некаторых серый апошняга сезону.

Ісландскія сталіца заняла пятае месца па кошце кароткатэрміновай арэнды жылля ў рэйтынгу Bloomberg за 2017 год. Сутачная арэнда жылля для двух чалавек у Рэйк'явіку складае $171, што на 20,4% вышэй, чым летась, паведамляе інфармацыйнае агенцтва са спасылкай на звесткі каучсерфінгавага агенцтва Airbnb.

Наплыў турыстаў таксама выклікаў у Ісландыі рост попыту на паслугі гатэляў. Па кошту гатэльнага нумара на дваіх за адну ноч Рэйк'явік заняў у рэйтынгу Bloomberg чацвёртую пазіцыю. За год гэты паказчык павялічыўся на 16,7% і склаў у сярэднім $259, піша агенцтва.

Рэзкі рост кошту кароткатэрміновай арэнды і паслуг гатэляў у Ісландыі, акрамя цікавасці турыстаў да здымкаў тэлесерыяла, выкліканы таксама разрывам паміж попытам і прапановай на мясцовым рынку арэнды і паслуг гатэляў, мяркуе Bloomberg. Паводле звестак Банка Ісландыі, на якія спасылаецца агенцтва, у 2017 годзе чакаецца больш за 2 млн турыстаў, у той час як насельніцтва краіны складае блізу 340 тыс. чалавек.

Кароткатэрміновая арэнда прымае на сябе вялікую долю ісландскіх турыстаў, і чакаецца, што ў найбліжэйшай будучыні гэтая сфера эканомікі абгоніць гатэльны бізнэс у памерах і даходнасці, прыводзіць Bloomberg словы спецыялістаў Банка Ісландыі.