ААН: Асноўным матывам нападу віруса Petya былі не грошы
4- 29.06.2017, 14:04
- 7,958
Следчыя дагэтуль не могуць устанавіць ініцыятараў апошняй глабальнай кібератакі.
Cтратэгія нападнікаў паказвае, што не грошы былі асноўным матывам іх дзеянняў.
Пра гэта заявіў кіраўнік Глабальнай праграмы Арганізацыі Аб'яднаных Нацый у кіберзлачыннасці Ніл Уолш, паведамляе «Радыё Свабода».
Праграмнае забеспячэнне, якое выкарыстоўвалася падчас нападу на гэтым тыдні, было значна больш складаным, чым тое, якое ўжывалася ў папярэдніх нападах з ужываннем віруса WannaCry, адзначыў спецыяліст.
Але ініцыятары новага нападу не дасведчаныя ў пытанні збору выкупу ад ахвяр у абмен на разблакаванне іх кампутараў, сцвярджае Уолш. Гэта, з ягоных слоў, дазволіла 28 чэрвеня заблакаваць уліковы запіс і зрабіць немагчымым атрыманне грошай.
«Гэта можа быць кожны: ад нейкага хлопца, які сядзіць у склепе, да нацыянальнай дзяржавы», - сказаў кіраўнік Глабальнай праграмы ААН у кіберзлачыннасці.
27 чэрвеня маштабная хакерская атака пачалася ва Украіне, яна заразіла кампутары ўрада, банкаў, прадпрыемстваў. Аб кібератацы паведамілі і ў іншых краінах.
Значная шкода была нанесеная ў Італіі, краінах Цэнтральнай Еўропы і Ізраілі. У Нямеччыне «заражаная сістэма цэнтральнага офіса кампаніі Nivea Beiersdorf у Гамбургу», паведамляе тэлеканал ARD. У Расеі атаку зазнала дзяржаўная карпарацыя «Раснафта».
Напады зазналі і некаторыя беларускія арганізацыі.
28 чэрвеня кампутарны вірус-вымагальнік Petya распаўсюдзіўся на краіны Азіі. У Індыі праз кібератаку выйшла са строю сістэма кіравання грузамі найбуйнейшага порта краіны. Збоі зафіксавалі і ў Кітаі, аднак іх маштабы не былі такімі значнымі.
Вірус Petya шыфруе звесткі на кампутары і патрабуе выкуп. Спецыялісты ў кампутарнай бяспецы раяць нічога не плаціць - ніякіх ключоў пасля выплаты грошай уладальнікі зараджаных кампутараў не атрымліваюць.
Такім чынам дзейнічаў вірус-вымагальнік WannaCry, ад якога ў траўні 2017 года пацярпелі больш за 300 тысяч кампутараў у 150 краінах.