Трамп-малодшы выклаў у сеціва перапіску, якая тычыцца РФ

Расейцы сапраўды прапаноўвалі сыну прэзідэнта ЗША інфармацыю-кампрамат пра Гілары Клінтан.

Сын прэзідэнта ЗША Дональд Трамп-малодшы апублікаваў электронную перапіску, з якой вынікае, што расейцы сапраўды прапаноўвалі яму інфармацыю-кампрамат пра Гілары Клінтан, паведамляе ВВС.

Цяпер і ФБР і кангрэс ЗША расследуюць магчымае ўмяшанне Расеі ў прэзідэнцкую кампанію ў Злучаных Штатах і спрабуюць зразумець, ці ўступалі якія-небудзь члены каманды Трампа ў змову з Крамлём.

У аўторак Дональд Трамп-малодшы выклаў у "Твітар" перапіску, суправадзіўшы яе такой заявай:

"Імкнучыся да поўнай адкрытасці, я публікую поўную электронную перапіску з Робом Голдстоўнам аб сустрэчы 9 чэрвеня 2016 года. Першае паведамленне ад 3 чэрвеня 2016 года было даслана Робам і тычылася просьбы ад Эміна [Агаларова] - чалавека, якога я ведаў з часу конкурсу прыгажосці Міс сусвет 2013 года, які праводзіўся пад Масквой. Эмін і ягоны бацька [Араз Агалараў - заўв.] валодаюць вельмі паважанай кампаніяй у Маскве. Я думаў, што інфармацыя, якая ў іх ёсць - гэта кампрамат пра Гілары Клінтан. Спачатку я хацеў проста пагаварыць праз тэлефон, але, калі гэта не атрымалася, мне сказалі, што ў Нью-Ёрку будзе жанчына (з інфармацыяй), і папрасілі з ёй сустрэцца.

Жанчына, як яна сама ўжо заявіла публічна, не была афіцыйным прадстаўніком [расейскага] ўрада. І, як мы ўжо сказалі, у яе не было для нас інфармацыі, яна хацела пагаварыць пра палітыку ўсынаўлення і пра спісы Магніцкага. Для кантэксту дадам, што гэта адбылося да таго, як пачалася цяперашняя ўстурбаванасць з нагоды Расеі. І, як заявіў сёння прэсе Роб Голдстоўн, сустрэча была "самым неймаверным глупствам, якое я калі-небудзь чуў, і мяне гэта па-сапраўднаму ўсхвалявала".

Расея - Клінтан

Як вынікае з апублікаванай перапіскі, Роб Голдстоўн паведаміў Трампу-малодшаму аб наяўнасці дакументаў пра сувязь Гілары Клінтан з Расеяй на просьбу Эміна Агаларава, сына расейскага бізнэсоўцы і кіраўніка кампаніі Crocus Group Араза Агаларава.

Як гаворыцца ў лісце Роба Голдстоўна ад 3 чэрвеня, нейкі "каралеўскі пракурор" Расеі сустрэўся з Аразам Агаларавым і паведаміў пра наяўнасць такой інфармацыі.

Тэма электроннага ліста ад Голдстоўна паказаная як "Расея - Клінтан, канфідэнцыйная інфармацыя-кампрамат".

"Гэта частка кампаніі ўладаў Расеі з мэтай дапамагчы Трампу перамагчы на выбарах", - гаворыцца ў тым жа лісце Голдстоўна да Трампа-малодшага.