Як прафзвяз РЭП «хадзіў у людзі»

Актывісты распыталі жыхароў Рэчыцы, ці ведаюць яны пра незалежныя прафзвяз.

Алена Лінкевич кіраўніца рэчыцкай прафгрупы, і ейны намеснік Аляксандр Навуменка задалі мінакам у Рэчыцы некалькі пытанняў пра незалежныя прафзвязы, піша praca-by.info.

Падставай да «хаджэння ў людзі» паслужыла газета прафзвязу РЭП «Працоўная салідарнасць», якую актывісты спачатку кідалі ў паштовыя скрыні, а потым, палічыўшы такі спосаб распаўсюджвання неэфектыўным, надумалі раздаць выданне мінакам, заадно спытаўшы, ці ведаюць людзі нешта пра незалежныя прафзвязы Беларусі.

Алена Лінкевіч адзначыла добразычлівыя стаўленне мінакоў да апытання:

- З кожным, хто ішоў нам насустрач, мы размаўлялі. Людзі добра адгукаліся, спыняліся, ішлі на кантакт. Не было такога, каб нехта высалапіўся нам або паслаў на сухі лес.

На пытанні, са слоў лідара прафгрупы, людзі адказвалі па-рознаму:

- 50 на 50. Некаторыя паціскалі плячыма, некаторыя ведалі пра незалежныя прафзвязы. Але сустрэліся і такія людзі, якія адказалі, што ў Беларусі чатыры незалежныя прафзвязы, а хтосьці нават шчыра казаў, што ведае РЭП.

Алена Лінкевіч кажа, што такія «хаджэнні ў людзі» стануць рэгулярнымі, бо даюць добрыя вынікі:

- Мы з Аляксандрам Навуменка паднялі прафзвязныя ўліковыя карткі і падумалі, што для нашага горада, у якім жыве за 70 000 чалавек, прафгрупа з 22 чалавек - гэта вельмі мала. Будзем і далей стасавацца з людзьмі.