Часовы павераны ЗША ў Беларусі: Мы цвёрда падтрымліваем вашу незалежнасць

Дэкларацыя аб дзяржаўным суверэнітэце стала першым крокам да атрымання Беларуссю незалежнасці ў 1991 годзе.

ЗША цвёрда падтрымліваюць незалежнасць і суверэнітэт Беларусі, заявіў часовы павераны ў справах ЗША ў рэспубліцы Роберт Райлі, паведамляе interfax.by.

«Як я неаднаразова казаў, ЗША цвёрда падтрымліваюць незалежнасць і суверэнітэт Беларусі», - гаворыцца ў паведамленні Райлі, прысвечаным 27-годдзю прыняцця Дэкларацыі аб дзяржаўным суверэнітэце Беларусі.

Часовы павераны канстатаваў, што дэкларацыя стала першым крокам у працэсе, які прывёў да атрымання Беларуссю незалежнасці ў 1991 годзе.

Вярхоўны Савет Беларускай ССР прыняў Дэкларацыю аб дзяржаўным суверэнітэце 27 ліпеня. Дэкларацыя абвясціла «поўны дзяржаўны суверэнітэт Рэспублікі Беларусь як вяршэнства, самастойнасць і паўнату дзяржаўнай улады рэспублікі ў межах яе тэрыторыі, правамоцнасць яе законаў, незалежнасць рэспублікі ў замежных стасунках».