Аднавяскоўцы Лукашэнкі: Чуткі пра нашы заробкі перабольшаныя

Журналісты пабывалі ў гаспадарках, якія ўвойдуць у ТАА «Купалаўскае».

Як усё пачыналася

Упершыню ідэю стварэння чарговага сельскагаспадарчага холдынгу Аляксандр Лукашэнка агучыў у лістападзе 2012-га. Тады гаворка ішла пра арганізацыю комплексу на базе акцыянерных таварыстваў «Амкадор-Шклоў», «Новае Юбілейнае» і «Вялікія Славені».

У пачатку ліпеня гэтага года на падставе ўказа №232 ад 29 чэрвеня 2017 года «Аб стварэнні гаспадарчага таварыства» Шклоўскі райвыканкам прыняў рашэнне «Аб стварэнні таварыства з абмежаванай адказнасцю «Купалаўскае».

У яго ўвойдуць чатыры прадпрыемствы, у тым ліку тры даччыныя кампаніі холдынгу: ЗАТ «Вялікія Славені», ААТ «Амкадор-Шклоў» і ААТ «Новагарадзішчанскае».

- На прыкладзе Копысі я хачу паказаць усім, якім павінен быць пасёлак гарадскога тыпу, а на прыкладзе холдынгу «Купалаўскае» - якім павінна быць сельгасвытворчасць у XXI стагоддзі. Гэта той шлях, па якім мы будзем ісці, перабудоўваючы і ўладкоўваючы Беларусь, - падзяліўся планамі на будучыню Лукашэнка падчас нядаўняга візіту на малую радзіму.

Карэспандэнты «Салідарнасці» наведалі некалькі гаспадарак, якія ўвойдуць у будучы холдынг, каб даведацца пра настроі людзей.

Ужо холдынг набліжаецца, а радасці ўсё няма

Вёска Малыя Славені, крама. На парозе сустракаем прадавачку і некалькі мясцовых жыхарак. Іх адказ на пытанне пра будучыню холдынгу здзіўляе:

- Быў у нас сход акцыянераў, так мы адмовіліся ўступаць у гэты холдынг!

На сустрэчнае пытанне аб прычынах такога дэмаршу ад адной з жанчын пачулі наступнае:

- Якая розніца, дзе быць акцыянерам. Я ў сваім калгасе адзін толькі раз атрымала выплату, як акцыянер - 60 тысяч на старыя. І больш ні капейкі.

Нашы суразмоўніцы не вераць, што новае аб'яднанне стане другім «Александрыйскім».

- У калгасе, калі адпрацуеш па норме ўсе рабочыя дні, то атрымаеш не болей за 260 рублёў. Заробак, як пенсія. І гэта ў сезон, а што зімой людзі атрымліваюць? І нічога, капейкі...

А вось пра «Гарадцы», у якім пачынаў кар'еру Аляксандр Лукашэнка, гавораць з зайздрасцю. Там, маўляў, і заробкі нармальныя, і аграгарадок дагледжаны, не тое, што ў нас.

Як мы высветлілі крыху пазней, чуткі пра заробкі ў Гарадцы былі перабольшаныя.

Па дарозе ўглыб вёскі праязджаем мехдвор і кароўнікі. У канторы над стэндам з інфармацыяй аб перадавіках сельгасработ лунае чырвоны сцяг.

Дарога з асфальтаваннем пераходзіць у грунтавую. Малыя Славені сустракаюць кабінай ад трактара, што стаіць каля плота.

Мясцовыя пенсіянеркі пра будучыню холдынгу ведаюць менш нашага: «Мала хто чытаў штосьці ў газетах». Аптымізму няма і ў іх:

- Лепш бы дарогу нармальную зрабілі! Які год ужо просім, а толку няма ніякага! - абураецца адна з суразмоўніц.

З ейных слоў, восенню і вясной па іх вуліцы можна праехаць толькі на трактары, а пра легкавыя машыны можна забыць:

- Трактары ўвесь час тут едуць. Як размесяць бруд, дык хоць з хаты не выходзь!

«Гарадзец» ужо не той

Дарога ў аграгарадку Любінічы, які належыць да ЗАТ «Амкадор-Шклоў», прыкметна лепшая. Тут ляжыць новы асфальт, які, як сцвярджаюць мясцовыя жыхары, паклалі нядаўна да прыезду Лукашэнкі. Той, праўда, не прыехаў.

- Дырэктар тут строгі: ледзь трапіўся п'яны на працоўным месцы - адразу за вароты! - паведамляе мужчына, які сядзеў на лавачцы ў кампаніі сяброў.

Мужыкі ахвотна распавядаюць аб мясцовых парадках:

- Новы холдынг? А ў нас ніхто і не пытаўся. Хто ў простых людзей што пытаецца? Што захочуць, то і зробяць.

Заробкі ў гаспадарцы нядрэнныя, работы хапае ўсім ахвочым.

- Калi работа трэба - прыязджайце! Пастух-цялятнік тут да шасці мільёнаў за поўны месяц атрымлівае, - у ход ідуць важкія аргументы. Але пасля папярэдняй гаспадаркі ў агучаныя лічбы верыцца з цяжкасцю.

Яснасць у мясцовую бухгалтэрыю ўносіць сяльчанка:

- Заробкі тут не такія ўжо і вялікія. Прыкладна, як і ў суседніх гаспадарках.

Жыхарка Любініч распавяла, што ёй вядома пра будучыню холдынгу. З ейных слоў, увесь працэс стварэння будучага аб'яднання расцягнецца гадоў на дзесяць. І яшчэ невядома, чым усё скончыцца. Па чутках, уладальнік «Амкадор-Шклова» Аляксандр Шакуцін не ў захапленні ад гэтага актыву, які патрабуе шмат рэсурсаў.

У канцы размовы наша суразмоўніца і зусім ашаламіла нас, распавёўшы, што і «Гарадзец», і «Александрыйскае» ўжо даўно не тыя, што былі раней:

- Зразумела, што там лепей, чым у астатніх калгасах. Але людзі ж не могуць усім раёнам паехаць працаваць у Александрыю.