Павел Санковіч здабыў золата на этапе Кубка свету ў Нідэрландах

Беларус праплыў першым на дыстанцыі 50 м на спіне і ўзнавіў нацыянальны рэкорд.

Беларускі плывец Павел Санковіч заняў першае месца на дыстанцыі 50 м на спіне на трэцім этапе Кубка свету ў 25-метровым басейне, які скончыўся ў Эйндховене, паведамляе карэспандэнт БелТА.

Ён узнавіў нацыянальны рэкорд на дыстанцыі 50 м на спіне, праплыўшы з вынікам 22,84.

Папярэдні рэкорд таксама належаў Паўлу Санковічу (23,01) і быў абноўлены ў 2016 годзе.

У прызёрах таксама немец Эрык Крысціян Дзінэр (23,31 сек) і японец Масака Канека (23,55 сек). Чацвёртае месца на гэтай жа дыстанцыі заняў беларус Віктар Стасяловіч (23,63 сек).

Яшчэ адзін медаль у скарбонку беларускай каманды прынёс Ілля Шымановіч: у вызначальным заплыве на 50 м брасам ён стаў трэцім - 26,10 сек.

Першым фінішаваў Камерон ван дэр Бург з ПАР (25,63 сек), другім - расеец Кірыл Прыгода (26,00 сек).

У фінале на дыстанцыі 100 м батэрфляем таксама за крок ад п'едэстала фінішаваў Яўген Цуркін (50,13 сек), Ягор Дадолеў заняў шостае месца (51,03 сек). Першае месца заняў Чад ле Кло з ПАР (49,09 сек), Другое - італіец Матэа Рыволта (49,54 сек), бронзавую ўзнагароду здабыў амерыканец Том Шэлдс (49,70).

Кубак свету ў плаванні ў 25-метровым басейне прадоўжыцца ўжо восенню ў Азіі. 30 верасня сусветная плавальная серыя пройдзе ў Ганконгу, 4 кастрычніка ў горадзе Досе (Катар) адбудзецца чарговы этап. У лістападзе Кубак свету ў плаванні будзе праводзіцца ў Пекіне, Токіё і Сінгапуры.