Што кажуць замежнікі пра Віцебск

Самымі пераборлівым выявіліся турысты з Расеі.

Амаль праз месяц пасля XXVI Міжнароднага фестывалю «Славянскі базар», калі самыя ўражлівыя моманты ўсё яшчэ стаяць перад вачыма, ёсць сэнс пагаварыць пра рэакцыю гасцей горада на ўсё ўбачанае.

Vkurier.by высветліў у супрацоўнікаў гатэляў, кавярняў і экскурсаводаў, што гэта – быць замежным госцем у фестывальным Віцебску.

Віцебскія гатэлі расчаравалі замежнікаў

Пара спыняць мець ілюзіі, што гарадскія гатэлі могуць прымаць патрабавальных турыстаў, падзялілася супрацоўнік адной з віцебскіх гатэляў:

«Замежнікі, перш за ўсё скардзяцца на ўмовы пражывання, на якасць абслугоўвання, на няведанне замежнай мовы персаналам гатэля.

У індустрыі гасціннасці няма дробязяў – абсалютна ўсё мае значэнне. І без кваліфікаваных службоўцаў і чыстых сучасных нумароў гатэль не можа быць прывабным для гасцей, нават калі ён размешчаны ў маляўнічым раёне горада і мае комплекс дадатковых паслуг.

Дырэкцыя гатэля не хоча разумець аб тым, што сучасны турыст, іншаземец або наш суайчыннік, падарожнічаючы, мае магчымасць параўноўваць узровень».

Гэтыя словы пацвярджаюць госці на сайтах турсэрвісу TripAdvisor і booking.сом.

«Тыповы саўковы гатэль», у якім жыць можна, але не хочацца, – піша турыст Nikita аб гатэлі «Віцебск».

«З добрага – гэта толькі тое, што мы не начавалі на вуліцы», – дадае Raisa.

Мы разумеем, што асобныя водгукі могуць быць суб'ектыўнымі, але агулам сярэднія ацэнкі віцебскіх гатэляў цалкам адэкватныя. Аднак у некаторых выпадках сума, выдаткаваная на аплату знаходжання ў гатэлі, наводзіць кліента на вельмі крытычныя разважанні. Да прыкладу, адзін з карыстальнікаў сайта tripadvisor.ru піша аб гатэлі «Ветразь»:

«Неаднаразова чулі, што дырэктар гэтага гатэля падзарабляе на гаспадарцы. Спыняліся ў гасцініцы, каб праверыць на свае вочы ўзровень яе гаспадарання. Проста жах. Нумар душны і пракураны, уся мэбля носіць на сабе тоўсты пласт бруду. Вельмі непрывабны антураж.

Куды глядзяць улады горада, якія павінны кіраваць і сачыць за працай сваіх падначаленых. Такога дырэктара трэба здымаць з пасады без лішніх слоў. Прыезджыя і турысты судзяць аб горадзе, перш за ўсё улічваючы камфорт пражывання. Уявіце сабе, што думаюць тыя няшчасныя, якім «пашанцавала» спыніцца ў «Віцебсктурысце?»

А цяпер пра ежу

Віцебскія кавярні практычна не прыстасаваныя для тых людзей, што не гавораць па-расейску, распавёў афіцыянт Кірыл:

«Нават ва ўстановах, размешчаных у цэнтральнай частцы горада, меню не дублюецца на ангельскай. Не сакрэт, што ў кавярнях няма афіцыянтаў, якія могуць без праблем размаўляць з замежнікамі.

Прыходзілі да нас госці з Нямеччыны, Польшчы, шмат ангельскамоўных. І калі казаць аб кулінарных прыхільнасцях, то ўсім падабаюцца дранікі. Сярод гастранамічных узрушэнняў – халаднік, які замаўлялі, а потым адмаўляліся, заяўляючы, што гэта есці немагчыма. З іх пункту гледжання змяшаць каўбасу, агуркі, яйкі, цыбулю з квасам проста немагчыма.

Дарэчы, замежныя госці – патрабавальныя і капрызныя едакі. А з пункту гледжання чаявых персаналу больш выгадныя расейскія турысты».

Справядлівасці дзеля варта адзначыць, што на сэрвісах Foursquare і TripAdvisor з нагоды віцебскіх кавярняў і рэстарацый больш пазітыўных водгукаў. У большасці выпадкаў наведвальнікі ўсё ж задаволеныя. Але і негатыву ў каментарах пакуль стае.

«Жудаснае непрафесійнае абслугоўванне, нуль увагі на сталы. Афіцыянтка блытала і забывала пра заказ. Сталы брудныя. Незразумелы метад разліку, у чэку не прапісваецца поўная сума замовы. Узровень гэтай установы вельмі знізіўся», – напісаў Anchoys аб гастранамічным бары «Кут 90» чатыры тыдні таму.

«Адміністратарка сустракала гасцей з выразам на твары «дасталі ўсе». Можна, вядома, спісаць гэта на «Славянскі базар», але я была ў іншых месцах у Віцебску – там усё выдатна. Афіцыянты валодаюць «чароўнай» здольнасцю не глядзець у твой бок, груба размаўляюць. Ежа смачная – няма прэтэнзій, але атмасфера не вельмі прыязная», – падзялілася меркаваннем аб кавярні «Чараўнік» Olga з Піцера.

Экскурсавод Алена распавяла, што не падабаецца замежным турыстам у Віцебску. Як выявілася, больш за ўсё іх здзівіла вялікая колькасць тых, хто паліць.

Беларусь становіцца ўсё больш цікавай для замежных турыстаў – цяпер у нас можна не толькі паглядзець славутую «савецкую экзотыку», але і вельмі танна (паводле мерак замежнікаў) паездзіць па краіне, паласавацца натуральнымі стравамі і, вядома ж, паглядзець на нашых прыгажунь. Зрэшты, замежных гасцей дзівіць, што нашы жанчыны часта апранутыя недарэчна – занадта нахабна і адкрыта сэксуальна.

Звяртаюць увагу турысты на адсутнасць надпісаў і паказальнікаў на ангельскай мове. Не падабаецца замежнікам і тое, што не заўсёды і не ўсюды можна расплачвацца карткай – гэта не занадта зручна для замежнікаў, якія прызвычаіліся ўсё рабіць «па безналу». Здзіўленне выклікае і забарона на фатаграфаванне ў музеях і на выставах. Гэта ўжо называюць віцебскім «эксклюзівам».