Дачка экс-губернатара Гарадзеншчыны збегла за мяжу

Сваячка былога чыноўніка знаходзілася пад падпіскай аб нявыездзе.

У кастрычніку мінулага года ў СМІ паведамлялася аб тым, як фірма «Еўра-Пласт» паверыла дачцэ былога губернатара Гарадзенскай вобласці Уладзіміра Саўчанкі. У выніку фірма страціла $200 тысяч, якія яна спрабуе вярнуць дагэтуль.

Пасля выхаду артыкула яго гераіня і тая самая дачка экс-губернатара Надзея Шабанава заявіла пра тое, што апублікаваныя журналістамі Onliner.by матэрыялы зганьбілі яе гонар і годнасць.

Прычынілі бесперапынныя пакуты амаль на $10 тысяч.

У сваім пазове яна адмаўляла, што фірма «Агра-Інвест» (кампанія, якая абяцала паставіць сыравіну гарадзенскаму «Еўра-пласту») была ёй падкантрольная, і тое, што казала пра сувязі ў Казані.

- У выніку дзеяннямі адказчыкаў па распаўсюджванню звестак мне прычыненыя маральныя пакуты, - пісала ў пазове Надзея Шабанава. - Яны выяўляюцца ў бесперапынных душэўных перажываннях, звязаных з ілжывым абвінавачваннем і асуджэннем мяне ў вачах грамадскасці, з фармаваннем негатыўнага стаўлення навакольных да мяне, маіх дзяцей і блізкіх.

Свае бесперапынныя пакуты дачка экс-губернатара Горадні ацаніла на суму блізу $10 тысяч.

Нагадаем, пад гарантыі пастаўкі Надзея Шабанава аддала ў заклад «Еўра-Пласту» сваю кватэру ў Менску. Але калі мы патэлефанавалі ёй па каментар, жанчына патлумачыла, што прапанавала заклад кватэры «праз чалавечыя стасункі».

- Я думаю, што вы сутыкаліся з сітуацыяй, калі хто-небудзь са знаёмых бярэ крэдыт і просіць вас пабыць паручыцелем. Вось чаму ён ідзе паручыцелем? Таму што гэта проста чыста чалавечыя дачыненні, - казала тады дачка былога губернатара.

Ні Надзея Шабанава, ні яе бацька на пасяджэнні суда так і не прыйшлі

Між тым ужо пасля выхаду публікацыі кампанія «Еўра-Пласт» атрымала паведамленне, што ў дачыненні да Надзеі Шабанавай распачатая крымінальная справа паводле ч.4 арт.209 «Махлярства, учыненае ў асабліва значнай суме». Больш за тое, з канца 2015 года дачка экс-губернатара Горадні знаходзіцца пад падпіскай аб нявыездзе.

Першае судовае паседжанне паводле справы Шабанавай да Onliner.by прайшло 21 лістапада мінулага году. Мянчанка на яго не прыйшла, матываваўшы гэта тым, што «дрэнна сябе адчувае». Не было яе і на наступных чатырох пасяджэннях. Яе бацька, якога выклікалі як сведку, суды таксама праігнараваў.

Пры гэтым дырэктар кампаніі «Еўра-Пласт» Аляксандр Снарскі даваў паказанні як сведка і пацвердзіў усе факты з артыкула. Больш за тое, добры знаёмы Снарскага, які выступаў у якасці сведкі, пацвердзіў, што Надзея прапаноўвала і яму такую схему працы, але ён адмовіўся.

Агульная сума шкоды паводле справы аб махлярстве дочкі экс-губернатара - блізу $500 тысяч.

Апошняе пасяджэнне паводле справы Шабанавай супраць Onliner.by прайшло 27 ліпеня. Менавіта тады стала вядома, што крымінальныя справы ў дачыненні да дачкі экс-губернатара аб'ядналі ў адну, колькасць пацярпелых вырасла да пяці (тры фізасобы і дзве кампаніі), а шкода склала больш за 3,1 млрд недэнамінаваных рублёў, $300 тысяч і 19 тысяч еўраў.

1 чэрвеня гэтага года Надзеі Шабанавай выставілі абвінавачванні. Але выявілася, што ў Беларусі яе ўжо няма.

- У сувязі з тым, што абвінавачаная Шабанава схавалася ад органа папярэдняга расследавання, 2017.06.01 года абвешчаны яе вышук, - паведамілі суду следчыя. Больш за тое, яны таксама паведамілі, што з 12.06 у дачыненні да яе ўжытая мера стрымання ў выглядзе ўзяцця пад варту. Гэта значыць, што, як толькі Надзею Шабанаву адшукаюць, яна адразу ж трапіць у следчы ізалятар.

- У нас ёсць інфармацыя, што яна ва Украіне. Ведаем, што яе дзеці тут, муж таксама, а яна хаваецца, - кажа юрыст кампаніі «Еўра-Пласт» Яўген. - Якім чынам яна выехала туды нягледзячы на падпіску, мы не ведаем.

У выніку суд вызначыў пакінуць пазоў Надзеі Шабанавай да Onliner.by без разгляду. Вызначэнне ўвайшло ў законнае дзеянне, абскарджанню і апратэставанню не падлягае.