Актывіст з Баранавічаў злавіў чыноўнікаў «на гарачым»

Сістэму безадказнасці чыноўнікаў да беларусаў трэба выкараняць.

Беларускія чыноўнікі вышэйшага рангу давяраюць разгляд скаргаў ніжэйшым структурам. У выніку скаргі трапляюць да тых, на каго скардзіўся чалавек. Шукальнік праўды застаецца пры сваіх інтарэсах, а парушальнік закона жыве далей спакойна. Даходзіць да анекдатычнай сітуацыі пры адказе на скаргі, кажа сябра Аб'яднанай грамадзянскай партыі з Баранавічаў Мікалай Чарнавус (малодшы).

- Вось у мяне было некалькі скаргаў, некалькі зваротаў. Прыходзіць нейкі адзін абагульняючы адказ, і незразумела, на які мой ліст, скаргу гэты адказ. Яны даюць адказ на незразумела якую дату, скаргу, ліст - сядзіш і здагадваешся, што яны мелі на ўвазе, на што яны адказвалі, - распавёў «Радыё Рацыi» баранавіцкі актывіст.

Са слоў Мікалая Чарнавуса, такую сістэму безадказнасці чыноўнікаў да сваіх грамадзян трэба выкараняць. Клубок праблем пры сённяшнім стаўленні чыноўнікаў да іх развязання будзе толькі нарастаць.