Ахілесава пята расейскіх фінансаў

Падзенне курса расейскага рубля да еўра прывядзе да падаражання імпарту і раздзьмуе інфляцыю.

Узмацненне жорсткасці антырасейскіх санкцый ЗША негатыўна адбілася на расейскіх аблігацыях федэральнай пазыкі, аднак значна больш сур'ёзная пагроза можа зыходзіць з боку рэгіёну, нашмат больш блізкага да Расеі, піша Ксенія Галушка (Ksenia Galouchko) для bloomberg.com (пераклад - inosmi.ru).

Хоць узмацненне жорсткасці санкцый ЗША, пра якое было абвешчана ў чэрвені, затармазіла рост рублёвых аблігацый, змякчэнне грашова-крэдытнай палітыкі Цэнтрабанка Расеі па-ранейшаму прымушае інвестараў набываць гэтыя каштоўныя паперы, якія з пачатку года прынеслі ім больш за 10% у даляравым эквіваленце.

Аднак Goldman Sachs Group папярэджвае пра новыя рызыкі: падзенне курсу рубля да еўра сёлета на 8% прывядзе да падаражання імпарту і раздзьмуе інфляцыю, што прымусіць Цэнтрабанк Расеі запаволіць тэмпы зніжэння стаўкі і выкліча распродаж аблігацый федэральнай пазыкі.

«Далейшае павышэнне кошту расейскіх дзяржаблігацый з фіксаваным прыбыткам, магчыма, будзе больш цяжкім», - напісаў эканаміст Goldman Клеменс Граф (Clemens Grafe). На ягоную думку, ацэнка эканамічнага росту «вышэй кансенсусу» робіць гэтыя каштоўныя паперы «найбольш прывабным расейскім актывам».

Еўра ўмацоўваў свае пазіцыі сёлета на фоне аднаўлення эканомікі еўразоны, зніжэння палітычных рызык і чаканняў скарачэння праграмы колькаснага змякчэння Еўрапейскага цэнтрабанка. У жніўні чыноўнікі Еўрапейскага цэнтрабанка забілі трывогу ў сувязі з празмерным умацаваннем еўра, бо павышэнне яго курсу да максімальнага ўзроўню з моманту пачатку колькаснага змякчэння ў 2015 годзе перашкаджае спробам ажывіць інфляцыю.

На долю еўразоны, куды ўваходзяць 19 дзяржаў, прыпадае больш за трэць расейскага імпарту. Пастаўкі з Еўразвязу ў Расею выраслі ў першым паўгоддзі на 24% у параўнанні з папярэднім годам, пра што сведчаць звесткі Федэральнай мытнай службы.

Папярэджанні Goldman датычна расейскіх АФЗ супярэчыць пункту гледжання Morgan Stanley, які раней у жніўні назваў расейскія дзяржаблігацыі «самымі прадуктыўнымі» сярод аблігацый развіваных краін. У жніўні расейскія дзяржаблігацыі прадэманстравалі самыя найлепшыя вынікі сярод развіваных рынкаў, пра што сведчаць звесткі, сабраныя Bloomberg.

Граф павысіў свой прагноз наконт інфляцыі на канец года з 3% да 3,9%, чакаючы, што паслабленне рубля да еўра дадасць да 60 базісных пунктаў да інфляцыі ў снежні, а рост коштаў прадуктаў харчавання - яшчэ 30 базісных пунктаў. Банк таксама ўдвая скараціў свой прагноз зніжэння стаўкі ў Расеі - да 75 базісных пунктаў да канца года. Аднак, на думку Goldman, больш асцярожная пазіцыя Цэнтрабанка Расеі зробіць рубель больш прывабным.

Са слоў Графа, хоць халодны пачатак лета ў Расеі справакаваў «шок з прадуктовымі пастаўкамі», абменны курс уяўляе сабой «больш сур'ёзную праблему для інфляцыі».