На валаску

Адзін няёмкі рух - і луканоміка вылятае ў трубу.

Афіцыйная статыстыка зафіксавала скачок запазычанасці рэальнага сектара ў крэдытах і пазыках. За адзін месяц запазычанасць вырасла на 2,1 млрд BYN.

На такую суму, як у чэрвені-2017, запазычанасці прадпрыемстваў не раслі ні разу са студзеня-2016.

Выданне banki24.by высветліла прычыны павелічэння запазычанасці.

Чэрвень стаў першым месяцам 2017 года, у якім беларускі рубель аслабеў да даляра. Калі на 1 чэрвеня курс Нацбанк устанавіў 1,8642 BYN за 1 USD, то на 1 ліпеня - 1,9396 BYN за 1 USD.

Іншымі словамі, усяго за месяц беларускі рубель патаннеў да даляра на 3,7%. Яшчэ больш значна вырас курс еўра: на 1 чэрвеня ён быў роўны 2,0767 BYN за 1 EUR, на 1 ліпеня - 2,2088 BYN за 1 EUR. У выніку паслабленне беларускага рубля склала 6,4%.

Звыш паловы банкаўскіх крэдытаў намінаванае ў замежных валютах. Паводле звестак Нацбанку, на 1 ліпеня ўдзельная вага рублёвых крэдытаў у агульнай суме запазычанасці была роўнай 45,3%.

Таму цалкам лагічна, што разам з ростам курсу вырасла і назапашаная запазычанасць. Паміж 1 чэрвеня і 1 ліпеня запазычанасць у крэдытах і пазыках вырасла на 3,5%.

За кошт велізарнай абсалютнай велічыні запазычанасці рост у грашах склаў 2, 099 млрд BYN.

Рост запазычанасці за чэрвень адбыўся ва ўсіх рэгіёнах: ад + 0,7% у Берасцейскай вобласці да + 7,8% у Віцебскай.

У тройку лідараў у росце запазычанасці ў грашах увайшлі Менск (465 млн BYN), Менская вобласць (460 млн BYN) і Віцебская вобласць (+ 374 млн BYN). Блізу 67,7% прыросту запазычанасці ў крэдытах і пазыках у чэрвені дала прамысловасць.

Запазычанасць прамысловых прадпрыемстваў павялічылася на 1,421 млрд BYN. Унутры прамысловасці амаль увесь рост запазычанасці прыпаў на апрацоўку.

За чэрвень 2017 апрацоўчая прамысловасць нарасціла запазычанасць на 1,298 млрд BYN. Першыя месцы росту запазычанасці занялі дрэваапрацоўка і цэлюлозна-папяровая галіна (368 млн BYN), нафтаперапрацоўка (185 млн BYN), хімічная прамысловасць (163 млн BYN), машынабудаванне (134 млн BYN).

У адносным вылічэнні запазычанасць гэтых галін павялічылася на 6,8%, 11,7%, 5,2% і 3,6% адпаведна. Па-за прамысловасцю значны рост запазычанасці ў крэдытах і пазыках назіраўся ў сельскай гаспадарцы (142 млн BYN, + 2,8%), у будаўніцтве (293 млн BYN, + 4,6%), у сферы інфармацыі і сувязі (125 млн BYN, + 9%).

Магчыма, што менавіта курсавыя пераацэнкі запазычанасці ў крэдытах і пазыках з'елі прыбытак эканомікі ў чэрвені.

Паводле версіі Белстата, за гэты месяц увесь рэальны сектар зарабіў мікраскапічны прыбытак - 15,9 млн BYN. Дарэчы, гэта яшчэ раз паказвае, наколькі асцярожным павінен быць Нацбанк у курсавой палітыцы.

Адзін няёмкі рух - і ледзь ці не ўвесь бухгалтарскі прыбытак закрэдытаваных прадпрыемстваў вылятае ў трубу.