Экспэрт: «Суперкамбайн» ужо ёсць, ды толькі нікому не патрэбны

Не выключана, што яго выпусцяць у адным экзэмпляры - для Драздоў.

На праведзенай 22 жніўня нарадзе ў актуальных пытаннях развіцця беларускай эканомікі Лукашэнка анансаваў хуткі «прарыў» у вытворчасці сельскагаспадарчай тэхнікі.

- Яшчэ адзін напрамак у «Гомсельмашы» - стварыць суперкамбайн, які будзе пераўзыходзіць імпартныя аналагі. Я не буду раскрываць усе сакрэты, але такія задумкі і ўжо канкрэтныя напрацоўкі ў канструктараў ёсць, - заявіў кіраўнік.

Claas і John Deere. New Holland і Challenger ужо застылі ў трывожным чаканні таго, як іх пасарамаціць беларускі цуд тэхнікі. А людзі з надзвычай багатым уяўленнем ўжо ўяўляюць сабе, як «Гомсельмаш» пакідае з носам сусветна вядомыя канцэрны, якія ўкладваюць гіганцкія рэсурсы ва ўдасканаленне сваёй прадукцыі, піша gazetaby.com.

Зрэшты, тыя, хто хоць трохі сочаць за тэмай, ведаюць, што «няма аповесці сумнейшай на свеце», чым гісторыя беларускага суперкамбайна. Пра яе яшчэ мінулай вясной згадаў начальнік галоўнага ўпраўлення інавацыйнай і інвестыцыйнай дзейнасці Міністэрства прамысловасці Валерый Фішман у інтэрв'ю штотыднёвіку «Белорусы и рынок».

Аказваецца, «мы ўжо распрацавалі камбайн, які можа намалаціць 14 кг збожжа ў секунду». Аднак гэтая навіна цалкам не ўзрадавала айчынных аграрыяў. Справа ў тым, што патрэбы ў такім камбайне ў беларускай сельскай гаспадаркі няма: машына мае цікавасць для тых, у каго сярэдняя ўраджайнасць у раёне 100 цэнтнераў з гектара, а на нашых палях яна складае толькі 30-40 ц/га.

- Трактар, які не патрабуе прысутнасці кіроўцы, мы даўно стварылі. Гэта вельмі карысны праект, асабліва для ўнясення ўгнаенняў, бо іх колькасць вар'іруецца ў залежнасці ад характарыстык канкрэтнага ўчастка глебы. Аднак такая распрацоўка істотна павышае кошт тэхнікі, таму замоваў на вытворчасць перспектыўнага, інавацыйнага прадукту пакуль няма, - распавёў Фішман.

Той жа лёс рызыкуе спасцігнуць будучы суперкамбайн. Не выключана, што яго выпусцяць у адным экзэмпляры - для «Драздоў». А ўся астатняе сельская гаспадарка, якая захрасла ў мінулым стагоддзі, будзе выкарыстоўваць тэхніку больш простую і таннейшую: куры, якая дзяўбе па зярнятку, вялікая дзюба не толькі не патрэбная, але і супрацьпаказаная.