За паўгода беларусы атрымалі пералічэнняў з-за мяжы на $200 мільёнаў

Статыстыка паказвае, што беларусы ўсё часцей шукаюць працу за мяжой.

Прычым чым далей, тым больш актыўна беларусы атрымліваюць грошы з-за мяжы. Калі ў першым квартале гэтага года жыхарам краіны прыйшло крыху больш за $94 млн, то ў другім - ужо крыху больш за $101 млн. Усяго ж за паўгода мы атрымалі з-за мяжы 195,5 млн даляраў, піша kp.by. Летась за тыя ж паўгода прыйшло 149 млн.

Пры гэтым сярэдняя сума аднаго пералічэння крыху паменшылася - з 350 даляраў у першым квартале да 346 у другім.

Адпраўляць грошы за мяжу беларусы таксама сталі крыху больш. Калі ў першым паўгоддзі 2016 агульная сума грашовых пералічэнняў з Беларусі склала 71,9 млн даляраў, то ў першым паўгоддзі 2017 - 74,3 млн. А сярэдняя сума аднаго пералічэння ў другім квартале была роўная 339 даляраў.

Праўда, трэба мець на ўвазе, што ў гэтай статыстыцы ўлічваюцца толькі сумы, якія перасылалі праз буйныя міжнародныя сістэмы грашовых пералічэнняў (Western Union, MoneyGram, «Юністрым» і гэтак далей). Гэта значыць банкаўскія пералічэнні або сумы, якія, да прыкладу, беларускія гастарбайтэры прывезлі з сабой у кашальках, у кошт не ідуць. Ды і грошы гэта не абавязкова заробленыя. Іх могуць пералічваць тыя ж сваякі і сябры, якія хочуць дапамагчы сваім блізкім у Беларусі. Калі ж палічыць усе магчымыя спосабы траплення грошай у краіну з-за мяжы, у тым ліку і гатоўкай у кішэні, то сума атрымаецца значна большая. Напрыклад, за мінулы год беларусы ў агульнай суме атрымалі з-за мяжы 830,4 млн. даляраў у выглядзе асабістых пералічэнняў.

У Беларусі ёсць і свае ўнутраныя сістэмы грашовых пералічэнняў, хоць імі карыстаюцца не так актыўна. За першыя паўгода беларусы адправілі ўнутры краіны 3,8 млн. рублёў (амаль 2 млн. даляраў па цяперашнім курсе). Сярэдняя сума аднаго пералічэння ў другім квартале - 168 руб. 50 кап.