Ларыса Шчыракова прыйшла ў суд з вязанкай часнаку ад «нячысцікаў»
6- 9.08.2017, 19:52
- 24,151
Суд аштрафаваў незалежную журналістку на 805 рублёў.
На астатняе пасяджэнне суда Гомельскага раёна, якое прайшло 9 жніўня ў другой палове дня, журналістка-фрылансерка Ларыса Шчыракова прыйшла з вязанкай часнаку, паведамляе «Радыё Свабода».
«Гэта каб адпуджваць нячыстую сілу, каб суд разглядаў маю адміністрацыйная справа паводле закону і справядлівасці», - патлумачыла Шчыракова, часнок на шыі перад абвяшчэннем прысуду.
Суддзя Андрэй Сусла зачытаў матэрыялы справы і тут жа абвясціў пастанову: прызнаць Шчыракову вінаватай у незаконным вырабе прадукцыі СМІ без акрэдытацыі для польскага тэлеканала «Белсат» і аштрафаваць на 35 базавых адзінак - 805 рублёў.
Выкліканыя сведкі - адная з гераінь відэасюжэту і супрацоўнік абласной міліцыі, маніторылі інтэрнэт і ўбачылі на сайце «Белсата» рэпартаж Шчыраковай - на суд не з'явіліся.
Шчыракова гэты раз адмовілася ў судзе сведчыць супраць сябе:
«Практыка паказвае: абараняйся - не абараняйся, кажы - не кажы, да якіх нормаў нацыянальнага і міжнароднага права ні звяртайся, усё адно пакараюць. Інтрыга толькі ў тым, на дваццаць базавых аштрафуюць ці на пяцьдзесят. Суддзі не самастойныя ў палітычных справах, а мая адміністрацыйная справа - палітычная, замоўленая. Пастановы прымаюцца не ў судовых залах, а ва ўладных кабінетах».
Падтрымаць журналістыку ў суд Гомельскага раёна прыехалі некалькі дзесяткаў гараджан. Адзін з прысутных прынёс невялікі пульверызатар, каб асвяжыць у зале паветра - таксама ад дэманаў. Іншыя трымалі аркушы паперы з надпісамі: «Не магу маўчаць», «Я збіраю і распаўсюджваю інфармацыю, я такі, як Ларыса Шчыракова».
Падставай для цяперашняга пераследу журналісткі стаў відэасюжэт «Чыноўнікі дазволілі будаваць жыллё, а цяпер хочуць зруйнаваць», размешчаны на YouTube і паказаны ў чэрвені на «Белсаце».
Гэта пяты суд над Шчыраковай з пачатку года. Агульная сума штрафаў склала ўжо 3 381 рубель. На папярэднім пасяджэнні журналістка была ў судзе з вяровачнай пятлёй на шыі. Тады яна заявіла, што праз міліцыю і суды душаць не толькі свабоду слова, але і фінансава саміх незалежных журналістаў.