ДАІ Менскай вобласці атрымала новыя матацыклы BMW

Купля каштавала бюджэту круглую суму.

Учора ДАІ Менскай вобласці атрымала ў распараджэнне тры новыя матацыкла BMW F800GS. Як паведамілі Onliner.by ў Дзяржаўтаінспекцыі, гэтая тэхніка будзе выкарыстоўвацца для «кантролю за бяспекай дарожнага руху, а інспектары, якія нясуць на іх службу, будуць арыентаваныя на працу з матацыклістамі».

Матацыклы BMW F800GS абсталяваныя 2-цыліндравымі інжэктарнымі рухавікамі Rotax аб'ёмам 798 куб см. Магутнасць - 85 конскіх сіл, момант кручэння - 83 Н•м. Максімальная прадукцыйнасць матора дасягаецца на 5500-7500 аб/хв.

Новыя матацыклы таксама абсталяваны ўсім неабходным з улікам спецыфікі працы ДАІ.

Дарэчы, як распавялі ў абласной Дзяржаўтаінспекцыі, ужо заўтра супрацоўнікі на гэтых матацыклах будуць гарантаваць бяспеку дарожнага руху падчас правядзення міжнароднага фэсту H.O.G. Rally Minsk 2017. Нагадаем, што ў першай палове дня калона байкераў збярэцца ля Кургана Славы, а затым у суправаджэнні ДАІ пройдзе ў Менск да Палаца спорту на праспекце Пераможцаў.

Між тым учора ў сацыяльных сетках з'явілася фатаграфія, зробленая на адной з АЗС. На ёй выяўлена, як супрацоўнік ДАІ налівае бензін у каністру. У Дзяржаўтаінспекцыі растлумачылі, што паліва прызначалася менавіта для новых матацыклаў, якія патрабавалася перагнаць ад дылерскага цэнтра да месца стаянкі. Бензіну ў матацыклах было недастаткова, таму давялося іх дазаправіць.

Як раней паведамляў сайт Charter97.org, менская ДАІ збіраецца закупіць для новага падраздзялення 28 нямецкіх матацыклаў. Дамова аб гэтым укладзеная яшчэ 29 траўня 2017 года, пастаўніком выступіць ТАА «Белатра». Агульная сума закупкі складае 960 988 рублёў. Паводле курсу на 29 траўня гэта больш за $500 тысяч, а менавіта $516 715.

Як заявіў у інтэрв'ю сайту Charter97.org падпалкоўнік міліцыі ў запасе, апазіцыйны палітык Мікалай Казлоў, каментуючы закупку дарагіх матацыклаў:

- На мой погляд, гэта можна ахарактарызаваць толькі адной фразай: «Баль падчас чумы». Улічваючы эканамічную сітуацыю ў Беларусі, гэты рост беспрацоўя, гэтую галечу, аддаваць такія грошы на матацыклы для ДАІ - гэта ўжо празмерна.