Даля Грыбаўскайтэ: Вучэнні «Захад-2017» мадэлююць рэальны канфлікт з краінамі NATO
3- 18.09.2017, 17:19
- 14,501
Прэзідэнт Літвы распавяла генсеку ААН аб небяспецы расейска-беларускіх вайсковых вучэнняў.
Прэзідэнт Літвы Даля Грыбаўскайтэ ўвяла ў курс справы генеральнага сакратара ААН Антоніу Гутэрэша на расейска-беларускія вучэнні «Захад-2017». Яе словы прыводзіць прэс-служба прэзідэнцкага палаца, паведамляе РІА «Новости». Грыбаўскайтэ заявіла, што манеўры мадэлююць рэальны канфлікт з краінамі NATO, піша сайт lrp.lt.
Таксама прэзідэнт раскрытыкавала «скрытыя маштабы і сцэнары вучэнняў». На яе думку, усё гэта кажа «аб агрэсіўным і нападніцкім характары вучэнняў «Захад».
Акрамя таго, Грыбаўскайтэ выказала падтрымку рэформе ААН і абвінаваціла арганізацыю ў «недастатковай рэакцыі на парушэнні міжнародных правоў».
«Арганізацыя не выконвае сваю місію напоўніцу», - дадала прэзідэнт Літвы.
Вучэнні «Захад-2017» праходзяць з 14 да 20 верасня на палігонах у Беларусі, а таксама на тэрыторыі Расеі - у Калінінградскай, Ленінградскай і Пскоўскай абласцях.
Расейскія вайскоўцы заявілі, што характар вучэнняў - абаронны і антытэрарыстычны. Да манеўраў прыцягваюць амаль 13 тысяч вайскоўцаў, з Расеі ў Беларусь перакідваюць блізу 3 тысяч, паведамілі раней у Мінабароны РФ.
Першы этап вучэнняў прайшоў з 14 да 16 верасня. Другі стартаваў у нядзелю і прадоўжыцца да 20 верасня. Ён будзе прысвечаны адбіццю агрэсіі супраць Саюзнай дзяржавы.