У Кіеў з Менска прыляцела расейка з наркотыкамі і без дакументаў
11- 21.09.2017, 20:30
- 30,439
Затрыманая грамадзянка РФ мела прыкметы наркатычнага ап'янення.
Памежнікі Асобнага кантрольна-прапускнога пункта «Кіеў» затрымалі ў міжнародным аэрапорце «Барыспаль» грамадзянку Расейскай Федэрацыі, у якой у асабістых рэчах выявілі наркатычнае рэчыва. Пра гэта паведамілі ў прэс-цэнтры Дзяржаўнай памежнай службы Украіны ў Facebook.
Жанчына прыбыла рэйсам «Менск - Кіеў». Прайшоўшы на пашпартны кантроль, яна не змагла падаць дакументы, у сувязі з чым расейку адвялі для дадатковага кантролю. У памежнай службе адзначылі, што падчас размовы ў паводзінах жанчыны былі бачныя прыкметы наркатычнага ап'янення. А службовы сабака «спрацаваў» на торбу расейкі, у якой было знойдзена два скруткі ў фользе з рэчывам белага колеру.
Затрыманая не мела пры сабе ніякіх дакументаў, патлумачыўшы, што згубіла іх у самалёце. Пры гэтым яна назвалася грамадзянкай Расейскай Федэрацыі 1980 года. Са слоў затрыманай, яна прыбыла ва Украіну працаваць у адной з кампаній па продажы квіткоў.