Начальнік берасцейскай ДАІ: Кіроўцы без пасведчання будуць прыцягвацца да крымінальнай адказнасці

У заканадаўстве чакаюцца сур'ёзныя змены.

ДАІ Берасцейскай вобласці зрабіла інтэрв'ю з кіраўніком рэгіянальнай інспекцыі Сяргеем Талатаем. Сярод іншых прагучала і пытанне пра новаўвядзенні ў заканадаўстве. Начальнік абласной Дзяржаўтаінспекцыі назваў змены сур'ёзнымі. З ягоных слоў, неўзабаве зробяць больш жорсткім пакаранне для кіроўцаў, якія паўторна трапяцца за кіраванне без пасведчання, піша onliner.by.

Пакаранне для такіх прадугледжвае артыкул 18.19 КаАП РБ. У ім сказана: «1) Управа МС асобай, якая не мае права кіравання гэтым сродкам, а таксама перадача кіравання ТС асобе, якая не мае права кіравання, цягнуць накладанне штрафу сумай ад пяці да дваццаці базавых адзінак.

2) Тыя ж дзеянні, учыненыя паўторна цягам года пасля накладання адміністрацыйнага спагнання за такія ж парушэнні, цягнуць накладанне штрафу сумай ад дваццаці да пяцідзесяці базавых адзінак».

Сяргей Талатай сцвярджае, што плануецца зрабіць больш жорсткай адказнасць:

«Грамадзяне, пазбаўленыя права кіравання, якія дазволілі сабе паўторна сесці за стырно без пасведчання, будуць прыцягвацца ўжо не да адміністрацыйнай, а да крымінальнай адказнасці. Дарэчы, калі ў Англіі, Нямеччыне чалавек сеў за стырно без права кіравання, гэта расцэньваецца як сур'ёзнае злачынства. У большасці краін гэта крымінальнае злачынства. Мяркую, што гэта правільна, бо мы не ідзем выконваць функцыі хірурга, не маючы адпаведнай адукацыі? Нельга і за стырно аўтамабіля садзіцца, не маючы на гэта права».

Сяргей Талатай неаднаразова выказваўся за тое, каб прыбраць нерэгуляваныя пешаходныя пераходы, дэмантаваць знакі, якія забараняюць прыпынак і стаянку, выступіць катэгарычна супраць пашырэння праезнай часткі, укараніць у заканадаўства паняцце «дарожнае хуліганства», забараніць продаж алкаголю на запраўках.